Poème
Ô que mon Destin seroit beau
par François MAYNARD
Ô que mon Destin seroit beau, Si jusqu’au de-là du Tombeau Ma passion me pouvoit suivre. Ie mourrois sans plus differer : Mais ie crains qu’en cessant de vivre Ie cesse de vous adorer. Depuis que vostre esprit leger S’est repenté de m’obliger, La Mort est toute mon envie. Ie hay les Hommes, et le Iour ; Et si ie conserve ma vie, C’est pour conserver mon Amour. Confessez que vous avez tort, Apres m’avoir aymé si fort, De m’oster de vostre memoire ; Et sçachez que ce changement Est iniurieux à la gloire Qu’on donne à vostre Iugement. Mais, quoy ! c’est trop deliberer. Il faut mourir, et se tirer Des rigueurs de ma servitude. Cloris, vous choquez la raison ; Et payez d’une ingratitude Une Amour sans comparaison. L’Amant qui m’a despossédé, N’a iamais esté regardé Pour la hauteur de ses merites. Cessez de luy vouloir du bien, Vos Loix sont dignes d’estre escrites Dans un Cœur plus haut que le sien. Il n’est ny bien fait, ny bien né ; Et personne n’a deviné D’où vient que vous en faites conte. Vous estes dans l’aveuglement, Puisque vos beaux yeux n’ont pas honte De commander si bassement.
Connectez-vous pour laisser un commentaire.