Poème
Vivray-je long-temps miserable
par François MAYNARD
Vivray-je long-temps miserable, Loin de cette Nymphe adorable Dont les beaux yeux me sont si chers, Hoste d’un Païs solitaire Où ie suis contraint de me taire, Si ie ne parle à des Rochers. O ! que la Fortune des Hommes Qui vivent au iour où nous sommes, Dépend d’un volage Destin. A peine la plus assurée Peut-elle estendre sa durée Depuis le soir jusqu’au matin. L’Ame d’ayse et d’Amour ravie, I’ay passé l’Avril de ma vie Dans la Cour de mon ieune Roy : Où i’adorois le beau Visage De la plus aymable volage Qui iamais ayt rompu sa foy. Celle qui combla d’infortune Les murs qu’Apollon et Neptune Esleverent iusques aux Cieux, Quoy que la Grece nous raconte, N’eut sceu qu’avecque de la honte Paroistre devant ses beaux Yeux. Ses Yeux ont des fiertez aymables ; Et les Cœurs les plus estimables Font vanité de s’y brusler. Pour plaire à ces beaux homicides, Les Achilles et les Alcides N’auroient pas rougy de filer. N’ay-ie pas sujet de me plaindre De l’Astre qui m’a pû contraindre De revenir dans ces Desers. La Mort ne m’eust pas esté dure, A l’égal des maux que i’endure Loin de la Belle que ie sers. Soit que la nuit tende ses voiles, Ou que la clarté des Estoilles Se cache devant le Soleil ; Mon visage est trempé de larmes ; Et mes yeux ignorent les charmes Qui nous font aymer le sommeil. Mes regrets par leur violence Troublent la paix et le silence Des Bois solitaires et sains ; Et souz leur ombre il ne se cache Pan, ny Dryade qui ne sçache Le desastre dont ie me plains. Selon le conseil de la rage Qui m’oste le tiltre de Sage, Ie devrois me desperer, Et par la mort finir ma peine ; Puis qu’en cette absence inhumaine Ie ne vis que pour endurer. S’il plaisoit à tes Destinées D’achever mes tristes iournées, Ie verrois la fin de mes Vaux : Pourveu que sur ma Sepulture Ce Chef-d’œuvre de la Nature Arrachast l’or de ses Cheveux. I’yrois aux ombres amoureuses, Qui dans les Campagnes heureuses Reposent sous les mirthes vers, Dire que mon Nom a la gloire D’estre vivant en la memoire La plus belle de l’Univers. Où va ma raison débauchée ? Cloris ne seroit pas faschée Que mon destin fust terminé. Elle est pour moy toute de glace, Mon Rival occupe ma place ; Et rit de me voir détrôné. O ! que la Femme est imparfaite ; Et que ie fus certain Prophete, Quand, le cœur de crainte remply, Ie luy prédis, m’éloignant d’Elle, Ce que son humeur infidelle A depuis si bien accomply !
Connectez-vous pour laisser un commentaire.