Complainte. — Cherchez, mes tristes yeux, cherchez de tous costez

Cherchez, mes tristes yeux, cherchez de tous costez, Vous ne trouverez point ce que vous souhaitez, Vous ne verrez plus rien qui vous soit agreable ; Et vous, riches thresors du printans desirable, Ô prez ! temoins secrets de mon contentemant, Où pleine de desir j’attendoy mon amant, Accusant quelquefois sa trop longue demeure, Las ! portez le regret de son esloignement, Et plaignez de pitié la douleur que j’endure ! Ce fut icy qu’il me dist sa pensée, Dont je feigny me sentir offensée, L’appelant temeraire ; Mais ma feinte colere, Voyant ses pleurs, fut bien soudain passée. Car eussé-je voulu contre Amour me deffandre ? Helas ! douce riviere, où est mon cher Philandre ? Voicy bien tous les lieux où je le souloy voir, Quand au commencement Amour par son pouvoir Rangea mon ame libre en son obeïssance. J’eu près de ce buisson sa premiere accointance, Et senty dans mon cœur la sagette d’Amour, Qui perça le rocher que j’avois à l’entour, Et le chaste rempart de ma poitrine dure. Mais, si tost que je pense à ce malheureux jour, Je sens renouveler la douleur que j’endure : Je reconnoy cette basse valée, Où quelquefois, à l’écart reculée, J’entretenoy mon ame En l’amoureuse flame, Par un penser dont j’estoy consolée, Et disois en mon cœur, sans qu’on me peust entandre : Helas ! douce riviere, où est mon cher Philandre ? Voilà le clair ruisseau si souëfvement coulant, Où, pour passer le chaud du soleil violant, Je souloy demeurer sur l’herbage estenduë, De mon fidelle amant bien souvent attenduë. Las ! tout est bien icy ! les bois delicieux, Les costeaux, les buissons et les prez gracieux : Je voy le clair ruisseau, j’enten son doux murmure. Mais les voyant, sans voir le soleil de mes yeux, Je sens renouveler la douleur que j’endure. Aucunes fois mon ame je contente, Car, la trompant, je me le represente Dedans cette prairie. Ô douce tromperie, Qui mes esprits heureusement enchante ! Mais presque aussi soudain mon mal me vient reprandre. Helas ! douce riviere, où est mon cher Philandre ? Bien souvent je l’appelle en criant dans ce bois, Mais rien, sinon Echo, ne respond à ma voix, Dont je meurs de douleur, s’il advient que je panse Qu’il ne me respond point faute de souvenance, Ou que quelque autre amour son cœur a fait changer. Lors, pleine de fureur, me pensant bien vanger, Je l’appelle infidelle, inconstant et parjure, Et dis en sanglottant : Helas ! cruel berger, Regarde à tout le moins la douleur que j’endure ! Mais tout soudain ma triste fantasie Avec raison perd cette jalousie, Car sa foy trop louable Est constante et durable, Et d’autre ardeur son ame n’est saisie ; Car son cœur est à moy, nulle n’y peut pretandre. Helas ! douce riviere, où est mon cher Philandre ? Quand je suis en ces lieux, je n’y fay que penser, Qu’esgarer mon esprit, songer et ravasser, Demeurer sans mouvoir comme une souche morte. Les pasteurs de ces champs, me voyant de la sorte, Chacun à qui mieux mieux vont criant apres moy : Voy tes troupeaux, bergere, esperdus comme toy, Demeurant sans repaistre et fuyant la verdure. Las ! tout cela ne fait qu’augmenter mon esmoy, Et tousjours redoubler la douleur que j’endure. Voilà comment, ô ma seule pensée, Loin de tes yeux mon ame est oppressée ! Je languy solitaire, Rien ne me sçauroit plaire, Trop est en moy la tristesse amassée, Qui fait de mes deux yeux deux grands fleuves desçandre. Helas ! douce riviere, où est mon cher Philandre ?