De celluy, de qui l'Amye a faict nouvel Amy

Jusque à la mort Dame t'eusse clamée, Mais ung nouveau t'a si bien reclamée, Que tu ne veulx qu'à son Leurre venir: Si ne peulx tu contre moy soustenir, Pourquoy l'amour deust estre consommée. Car en tous lieux tousjours t'ay estimée, Et si on dict, que je t'ay deprimée, Je dy que non, et le veulx maintenir Jusque à la mort. Dieu doint que pis tu n'en sois renommée: Car s'il est sceu, tu en seras nommée Femme sans cueur, qui ne se peult tenir D'aller au change, et à grand tort bannir Celluy, qui t'eust parfaitement aymée Jusque à la mort.