Dialogue. — — Que ferez-vous, dites, madame

— Que ferez-vous, dites, madame, Perdant un si fidelle amant ? — Ce que peut faire un corps sans ame, Sans yeux, sans pouls, sans mouvement. — N’en aurez-vous plus souvenance Apres ce rigoureux depart ? — Au cœur qui oublie en absance, L’amour n’a jamais eu de part. — De tant d’ennuis qui vous font guerre, Lequel vous donne plus de peur ? — La crainte qu’en changeant de terre, Il puisse aussi changer de cœur. — N’usez jamais de ce langage, A sa foy vous faites grand tort. — C’est un evident témoignage Pour monstrer que j’aime bien fort. — Son amour si ferme et si sainte Doit tenir vostre esprit contant. — Je ne puis que je n’aye crainte De perdre ce que j’aime tant. — Auriez-vous beaucoup de tristesse, S’il venoit à changer de foy ? — Tout autant que j’ay de liesse, Sçachant bien qu’il n’aime que moy. — Quel est le mal qui vous offence, Attendant ce département ? — Tel que d’un qui a eu sentence Et attend la mort seulement. — Quoy ? vous pensez doncques, à l’heure Qu’il s’en ira, mourir d’ennuy ? — Il ne se peut que je ne meure, Mon esprit s’en va quand et luy. — Si tel accident vous arrive, Vostre amour ne durera pas. — La vraye amour est tousjours vive Et ne meurt point par le trespas.