Dialogue. — Que sera-ce de vous, privez de la lumiere

Que sera-ce de vous, privez de la lumiere, Pauvres yeux, dont le ciel vous contraint separer ? — Nous ferons de nos pleurs une large riviere, Et serons tousjours clos si ce n’est pour pleurer. Vous aurez pour confort la pourtraiture sainte, Qu’amour en mon esprit viendra representer. — Au cœur tant seulement servira cette fainte, Mais rien, sinon le vray, ne nous peut conforter. Cherchez doncques ailleurs plaisir qui vous contente, En tant d’objets divers, si plaisans et si beaux. — Lors que nous l’essayons, nostre douleur s’augmente, Trouvans au lieu de jour de bien petits flambeaux. Trompez-vous, et croyez de ces lumieres claires Que c’est le beau soleil qui vous peut consoler. — On ne se trompe point en choses si contraires, Et nous ne voyons rien qui le puisse égaler.