Du confict en douleurs

Si j'ay du mal, maulgré moy je le porte, Et s'ainsi est, qu'aulcun me reconforte, Son reconfort ma douleur poinct n'appaise: Voylà comment je languis en mal aise Sans nul espoir de liesse plus forte. Et fault qu'ennuy jamais de moy ne sorte, Car mon estat fut faict de telle sorte, Des que fuz né. Pourtant ne vous desplaise, Si j'ay du mal. Quand je mourray, ma douleur sera morte, Mais ce pendant mon pauvre cueur supporte Mes tristes jours en Fortune maulvaise: Dont force m'est que mon ennuy me plaise, Et ne fault plus que je me desconforte, Si j'ay du mal.