Mon bel ami, je voy trop bien...

Mon bel ami, je voy trop bien De vray, quel que le semblant soit, Que vostre cuer ne m’aime en rien. Bien borgnes est qui ne le voit ; Vous le dites quoy qu’il en soit, Mais c’est tout pour moy faire pestre, Car l’œuvre loe le maistre. Il appert a vostre maintien Comment vo cuer d’amer recroit ; Car tout un moys, si com je tien, De moy veoir ne vous chauldroit. Que m’amissiez qui le croiroit ? Certes, ce ne pourroit estre, Car l’œuvre loe le maistre. Dont trop pour fole je me tien, Et aussi chascun m’i tendroit, De vous amer ; car nesun bien De ce venir ne me pourroit, Puis qu’en riens ne vous en seroit, Et j’aperçoy trop bien vostre estre Car l’œuvre loe le maistre.