Pour un Ballet de Douze de Ses Filles

Douze filles d’Afrique, honneur de leur contrée, En qui du plus haut ciel la puissance est monstrée, Dont les yeux prennent tout et ne sont jamais pris, Avoient fait un dessein de passer leur jeunesse, Tousjours en liberté, n’adorant pour maistresse Que la chasteté seule empreinte en leurs espris. Filles, si vous voulez (leur dit la voix certaine De l’oracle d’Ammon) vostre foy n’estre vaine, Et qu’un si beau desir finisse heureusement, Il faut aller en France, où le ciel vous appelle, Là toutes les vertus, dont la gloire est si belle, Couvrent leur deïté d’un mortel vestement. La royne du pays, en beautez admirable, Est la chasteté mesme ; et vive et remarquable, Elle parle en sa bouche, elle luit en ses yeux. Passez vostre bel âge à si digne service, Et luy brûlez vos cœurs en devot sacrifice ; C’est estre en liberté que de servir les dieux. Elles s’acheminoient au destiné voyage, Toutes pleines de flame et d’aise en leur courage ; Le travail leur est doux, esperant si haut pris, Lors que douze geans qui n’ont dieux que leurs armes, Marchans pour les ravir, comblent leurs yeux de larmes, De frayeur leur poitrine et leur bouche de cris. Tout espoir leur defaut et toute aide celeste, Quand ces petits guerriers, dont la taille et le geste Est semblable aux amours, courent à leur support ; Et, bien qu’un tel secours causast peu d’esperance, Leur bras eut tant d’adresse et leur cœur d’asseurance, Que les monstres cruels furent tous mis à mort. Depuis, par leur conduite et leur force incroyable, Elles ont surmonté maint danger effroyable, Avant que d’aborder à ce port desiré ; Mais tant de maux soufferts et de peines passées Maintenant à souhait leur sont recompensées, Voyant l’astre immortel en leurs vœux adoré. Royne, honneur de nostre age et sa gloire premiere, Si vostre œil tout divin est leur seule lumiere, Adorans saintement son pouvoir nompareil, Favorisez le zele et la foy de leurs ames ; Et pour humble present, vous, le soleil des dames, Recevez de leurs mains l’image du soleil.