Responce dudict Marot, au dict Clavier

Pour bien louer, et pour estre loué De tous espritz tu doys estre alloué, Fors que du mien, car tu me plus que loues: Mais en louant plus haultz termes alloues, Que la sainct Jehan ou Pasques, ou Noué. Qui noue mieulx, responds, ou C, ou E? J'ay jusque icy en eau basse noué, Mais dedans l'eaue Cabaline tu noues, Pour bien louer. C, c'est Clement contre chagrin cloué. E, est Estienne, esveillé, enjoué: C'est toy, qui maintz de loz tresample doues, Mais endroit moy tu fais Cignes les Oues, Quoy que de loz doives estre doué, Pour bien louer.