Sonnet V. — Lycaste et Philemon qu’un seul trait a blessez

Lycaste et Philemon qu’un seul trait a blessez, Et qui n’ont leurs pareils en amour pure et sainte, Ô celeste Venus ! te consacrent en crainte, Avec des myrthes verts, ces lys entrelacez. Favorise leurs vœux, à toy seul adressez, Fay que leur claire ardeur ne soit jamais esteinte Et que leur pure foy chasse au loin toute feinte, Rendant par sa blancheur les beaux lys effacez. Ainsi qu’un seul filet ces fleurettes assemble, Qu’un seul nœu pour tousjours lace leurs cœurs ensemble, Et qu’aucun accident ne le puisse trancher. Fay qu’un mesme vouloir regne en leur fantaisie, Qu’ils n’espreuvent jamais que c’est que jalousie, Et l’envieuse dent ne les puisse toucher.