Sur la devise de Madame de Lorraine: Amour, et Foy

Amour, et Foy sont bien appariez, Voire trop mieulx ensemble mariez Que les humains, qu'en ce Monde on marie: Car jamais Foy de l'Amour ne varie: Et vous humains bien souvent variez. Dames de cueur icy estudiez: Ces deux beaulx dons Dieu vous a dediez, Et sont seans en haulte seigneurie Amour, et Foy. Tant sont uniz, tant sont bien alliez, Qu'oubliant l'ung, l'autre vous oubliez: Si l'Amour fault, la Foy n'est plus cherie: Si Foy perit, l'Amour s'en va perie: Pour ce les ay en devise lyez, Amour, et Foy.