Belle plaisant, sur toutes trés amée...

Belle plaisant, sur toutes trés amée, De tout mon cuer ma souvraine maistresce, Appercevez que, plus que chose née, Vous aims et crains et vous sers en humblesce, Et pour ce, oster le mal qui tant me blesce Vous plaise tost et ouÿr ma clamour, Et me vueillez ottroyer vostre amour. Et se par vous m’est tel joye donnée Vous me mettrés en la voye et adresce D’estre vaillant, et bien guerredonnée Sera toute ma paine et ma destresce. Or le faittes, ma souvraine princesce, Sy n’y mettez plus dongier ne demour, Et me vueillez ottroyer vostre amour. Mon fin cuer doulx, ma dame redoubtée, Retenez moy, car je vous fais promesce Que vostre honneur sera par moy gardée Entierement, et tousjours sans paresce Vous serviray com ma doulce déesse ; Sy me prenez a mercy, doulce flour, Et me vueillez ottioyer vostre amour. Plaisant tresor, faittes moy tel largesce De voz doulx biens que ma douleur en cesse. Secourez tost le mal ou je demour, Et me vueillez ottroyer vostre amour.