C’est la complainte au roi de Navarre

Pitiez à compleindre m’enseigne D’un home qui avoit seur Seine Et sor Marne maintes maisons ; Mais à teil bien ne vint mais hons Comme il venist, ne fust la mort Qui en sa venue l’amort. C’est li rois Thiebauz de Navarre. Bien a sa mort mis en auvarre Tout son roiaume et sa contei Por les biens c’on en a contei. Quant li rois Thiebaus vint à terre Il fut asseiz, qui li mut guerre Et qui mout li livra entente, Si que il n’ot oncle ne tente Qui le cuer n’en éust plain d’ire ; Mais je vos puis jureir et dire Que c’il fust son éage en vie De li cembleir éust envie Li mieudres qui orendroit vive, Que vie si nete et si vive Ne mena n’uns qui soit ou monde. Large, cortois et net et monde, Et boen au chans et à l’ostei, Tel le nos a la mort ostei. Ne croi que mieudres crestiens, Ne jones hom ne anciens, Remainsist la jornée en l’ost ; Si ne croi mie que Dieux l’ost D’avec les sainz, ainz l’i a mis, Qu’il at toz jors estei amis A sainte Eglize et à gent d’ordre. Mout en fait la mors à remordre Qui si gentil mortel a mors ; Piesà ne mordi plus haut mors : Jamais n’iert jors que ne s’en plaigne Navarre et Brie et Champaingne. Troie, Provins, et li dui Bar, Perdu aveiz vostre tabar, C’est-à-dire vostre secours. Bien fustes fondei en décours ; Quant teil seigneur aveiz perdu, Bien en deveiz estre esperdu. Mors desloauz, qui rienz n’entanz, Se le laissasses .lx. anz Ancor vivre par droit aage, Lors s’en préisses le paage Si n’en péust pas tant chaloir ; Or estoit venuz à valoir. N’as-tu fait grant desconvenue Quant tu l’as mort en sa venue ? Mors desloiaux, mors de pute aire, De toi blameir ne me puis taire Quant il me sovient des bienz faiz Que il a devant Tunes faiz, Où il a mis avoir et cors ! Li premiers issuz estoit fors Et retornoit li darreniers. Ne prenoit pas garde au deniers N’auz garnizons qu’il despandoit ; Mais saveiz à qu’il entendoit, A viseteir les bones genz. Au mangier estoit droiz serjenz, Après mangier estoit compains De toutes bones teches plains, Pers aus barons, aus povres peires, Et aus moiens compains et frères ; Bons en consoil et bien méurs, Auz armes vistes et séurs, Si qu’en tout l’ost n’avoit son peir. Douz foiz le jor faisoit trampeir Por repaistre les familleuz. Qui déist qu’il fust orguilleuz Et il le véist au mangier, Il se tenist por mensongier. Sa bataille estoit bone et fors, Car ces semblanz et ces effors Donoit aux autres hardiesse. Onques home de sa jonesse Ne vit n’uns contenir si bel, En guait, en estour, en cembel. Qui l’ot en Champagne véu, En Tunes l’ot desconnéu : Qu’au besoing connoît-hon preudome ; Et vos saveiz, ce est la somme, Qui en pais est en son païs Tenuz seroit por foux nayx C’il s’aloit auz paroiz combatre. Par ceste raison vuel abatre Vilonie, s’on l’en a dite, Que sa vaillance l’en acquite. Quant l’aguait faisoit à son tour, Tout ausi come en une tour Estoit chacuns asséureiz, Car touz li oz estoit mureiz : Lors estoit chascuns aséur Car li siens gaiz valoit .i. mur. Quant il estoient retornei, Si trovoit-hon tot atornei Tables et blanches napes mises ! Tant avoit laians de reprises Donées si cortoisement Et roi de teil contenement, Qu’à aise sui quant le recorde, Por ce que chascuns c’en descorde Et que chascuns le me tesmoingne De ceulx qui virent la besoigne, Que n’en truis contraire nelui Que tout ce ne soit voirs de lui. Roi Hanrris, frères au bon roi, Dieux mète en vos si bon aroi Com en roi Thiebaut vostre frère ! Jà fustes-vos de si boen peire ! Que vos iroie délaiant Ne mes paroles porloignant ? A Dieu et au siècle plaisoit Quanque li rois Thiébauz faisoit : Fontaine estoit de cortoisie ; Toz biens iert sanz vilonie, Si com j’ai oï et apris De maître Jehan de Paris, Qui l’amoit de si bone amour Com preudons puet ameir seignor. Vos ai la matière descrite Qu’em troiz jors ne seroit pas dite. Messire Erars de Valeri, A cui onques ne s’aferi N’uns chevaliers de loiautei, Diex, par vos, si l’avoit fait teil Qui mieudres n’i est demoreiz Et au loing fust tant honoreiz. Prions au Peire glorieuz Et à son chier Fil précieus Et le Saint Esperit encemble En cui toute bonteiz s’asemble, Et la douce Vierge pucele Qui de Dieu fu mère et ancele, Qu’avec les sainz martirs li face En paradix et leu et place.