C’est le dit d’Aristotle

Aristoles à Alixandre Enseigne et si li fait entendre En son livre versié, Enz el premier quaier lié, Coument il doit el siècle vivre, Et Rutebues l’a trait dou livre. « De tes barons croi le consoil : Ce te loz-je bien et consoil, Jà serf de .ij. langues n’ameir Qu’il porte le miel et l’ameir ; N’essaucier home que ne doies, Et par cet example le voies C’uns ruissiaux acréuz de pluie Sort plus de roit et torne en fuie Que ne fait l’iaue qui décourt. Ausi fel essauciez en court Est plus crueuz et plus vilains Que n’est ne cuens ne châtelains Qui sont riche d’anceserie. Si te pri, por sainte Marie, Se tu voiz home qui le vaille, Garde qu’à ton bienfait ne faille ; N’i prent jà garde à parentei : C’om voit de teux à grant plantei Qui sont de bone gent estrait Dont on asseiz de mal retrait. Jadiz ot en Égypte .i. roi Sage, large, de grant esfroi, Liez et joians, haitiez et baux, Et ces fiz fu povres ribaux, Et conquist asseiz anemis. Puis que nature en l’ome a mis Sens et valour et cortoisie, Il est quites de vilonie. Tex est li hons com il se fait : I. homs son lignage refait Et uns autres lou sien depièce. Je ne porroic croire à pièce Que cil ne fu droiz gentiz hom Qui fausetei et trahison Heit et eschive et honeur ainme, Ou je ne sai pas qui s’en claimme, Jeutil ne vilain autrement. Or n’i a plus ; je te demant En don que tu ainmes preudoume, Car de tout bien est-ce la some. Hon puet bien reigneir une pièce Par faucetei avant c’om chièce, Et plus qui plus seit de barat ; Mais il covient qu’il se barat Li-méismes, que qu’il i mète ; Ne jamais n’uns ne s’entremète De bareteir que il ne sache, Que baraz li rendra la vache. Se tu iez de querele juge, Garde que tu si à droit juges Que tu n’en faces à reprandre : Juge le droit sans l’autrui prandre. Juges qui prent n’est pas jugerres, Ainz est jugiez à estre lerres. Et se il te covient doneir, Je ne ti vuel plus sarmoneir : Au doneir done en teil menière Que miex vaille la bele chière Que feras au doneir le don Que li dons, car ce fait preudom. Qui at les bones mours al cuer, Les euvres monstrent par defuer : Seule noblesce franche et sage Emplit de tout bien le corage Dou preudoume loiaul et fin. Ses biens li moinne à boenne fin Au mauvaiz part sa mauvistiez, Tout adès fait le deshaitiez Quant il voit preudoume venir, Et ce si nos fait retenir C’on doit connoistre boens et maus, Et desevreir les boens des faus. Murs ne arme ne puet desfendre Roi qu’à doneir ne vuet entendre ; Rois n’at mestier de forterresce Qui a le cuer plain de largesce. Hauz hom ne puet avoir nul vice Qui tant li griet comme avarice : A Dieu ce coumant qu’il te gart. Prent bien à ces chozes regart.