Chanson. — Pour voir ma fin toute asseurée

Pour voir ma fin toute asseurée, Que vos rigueurs ont preparée, Je ne me plains aucunement ; Car veu la douleur qui m’offense, La mort, venant soudainement, Me tiendra lieu de recompense. Sans plus pour mes yeux je me plains, Ces yeux qui vous ont veu si belle, Privez d’une lumiere telle, Faut-il, helas ! qu’ils soient estains ? Faut-il aussi que mes oreilles, Apres tant de douces merveilles Ravissant l’esprit bien-heureux, Pour jamais demeurent fermées, Sans que vos propos amoureux Les puissent plus rendre charmées ? Ce m’est un ennuy trop amer, Qu’il faille que ce cœur perisse, Qui fut nay pour vostre service, Et qui osa bien vous aimer. Mais en ce regret qui m’affolle Peu à peu je me reconsole, Pensant que c’est vostre vouloir. Car, puis que ma mort vous est chere ; Je n’ay garde de me douloir D’une chose qui vous peut plaire.