Ode. — De mes ans la fleur se desteint

De mes ans la fleur se desteint ; J’ay l’œil cave et palle le teint, Ma prunelle est toute ébloüie : De gris-blanc ma teste se peint, Et n’ay plus si bonne l’oüie. Ma vigueur peu à peu se fond ; Maint sillon replisse mon front, Le sang ne bout plus dans mes veines : Comme un trait mes beaux jours s’en vont, Me laissant foible entre les peines. Adieu chansons, adieu discours, Adieu nuicts que j’appeloy jours En tant de liesses passées, Mon cœur, où logeoient les amours, N’est ouvert qu’aux tristes pensées. « Le printans les roses produit, « L’esté plus chaud meurist le fruit, « Des saisons, divers est l’empire : « Aux amours la jeunesse duit, « L’autre âge autre chose desire. » Connaissant donc ce que je doy, Faut-il pas suivre une autre loy, Propre à mon age et ma tristesse ? Doy-je pas bannir loin de moy Tous noms d’amour et de maistresse ? Loin, bien loin, plaisir decevant ; Arriere espoir conceu de vant, Qui servois d’attiser ma flamme : La raison, serve auparavant, Soit maintenant royne en mon ame. Las ! durant que je parle ainsi, Et fains que mon cœur endurcy Soit fort pour d’amour se defendre, Ce dieu sans yeux et sans mercy Fait jaillir des feux de ma cendre. Un doux importun souvenir, Devant moy faisant revenir L’image en mon ame adorée, Garde que je ne puis tenir Contre amour de place asseurée. Seul sujet de mon déconfort, Pourquoy me presses-tu si fort, Repassant en ma souvenance La belle cause de ma mort, Et l’œil dont je pleure l’absance ? Mon cœur s’ouvrit par le milieu, Alors qu’au partir de ce lieu Tant de pleurs baignoient son visage ; Sans mourir je luy dis : Adieu ! Suis-je pas de lâche courage ? Fasse le ciel ce qu’il voudra, Ce jour au cœur me reviendra : Et, bien qu’il me tienne loin d’elle, Mon feu jamais ne s’esteindra ; J’en trouve la cause trop belle.