Sonnet LI. — Qu’avançé-je en l’aimant, sinon que je fay perte

Qu’avançé-je en l’aimant, sinon que je fay perte De moy, de mes soupirs, de mes pas, de mon tans ? Helas ! que ne sont donc mes desirs moins constans, Sans qu’ainsy je m’élance à ma mort toute ouverte ! La douleur que pour elle en trois ans j’ay soufferte, L’ennuy sechant mon teint en son plus doux printans, À l’envy de ma foy mes douleurs augmentans, La pitié de son ame assez m’ont découverte. J’ay tant versé de pleurs qu’un marbre en fust cavé, Dessus un diamant mon mal j’eusse engravé ; Et je n’avance rien, tousjours elle est cruelle ! Le propre d’un sujet sans le sujet ne faut, Le feu ne seroit feu s’il cessoit d’estre chaud, S’elle estoit sans rigueur ce ne seroit plus elle.