Sonnet LIX. — Puissent tousjours durer les ennuis si cuisans

Puissent tousjours durer les ennuis si cuisans, Dont ma bouche aux regrets sans relache est contrainte, Puis qu’il semble à mon ame, en cent chaines estrainte, Que sa rame et ses fers n’en sont pas si pesans. La nuict est ma lumiere, et mes jours plus luisans, Ce sont tristes horreurs, pleines d’ombre et de crainte ; Mon repos gist à faire une éternelle plainte, Et les lieux de plaisir me sont tous déplaisans. Ne me laisse donc point, ô dolente pensée ! Renais ainsi qu’une hydre en mourant renforçée, Et ne souffre mon œil de larmes s’épuiser. Car d’ennuis et de pleurs sans plus je me contente, Le soupirer m’est paix : aussi c’est mon attente, Que l’extrême soupir seul me doit appaiser.