Sonnet LVI. — Que ne suis-je endormy durant l’obscure nuict

Que ne suis-je endormy durant l’obscure nuict, Qui retient mon aurore et la cache à ma vuë ! Ô plaisir peu durable ! ô douleur mal prevuë ! Certes l’heur des humains comme un songe s’enfuit. L’image de ma perte en tous lieux me poursuit, Et du plaisir passé le souvenir me tuë. Las ! divine beauté, qu’estes-vous devenuë ? Je suis par vostre éclipse en tenebres reduit. Je ne sçay que je fay, je ne sçay que je pense ; Si fay, je pense en vous, dont l’ennuyeuse absence Me laisse accompagné de regret et d’esmoy. Sans cœur, sans mouvement, transi, muet et blesme, Revenez donc, mon tout, pour me rendre à moy-mesme ; Car, en vous esloignant, vous m’ostastes à moy.