Sonnet LXI. — Puis que tous les malheurs sont pour moy destinez

Puis que tous les malheurs sont pour moy destinez, Puis qu’avec le desdain ma constance est forçée, Puis que ma foy se voit d’oubly recompensée, Et mes yeux pour jamais à pleurer condamnez, Je te sacre, ô Vulcan ! ces vers infortunez, Ceste main malheureuse et ceste ame insensée. Vange-moy de moy-mesme, et ta flamme élançée Fasse que prontement ils soient exterminez. Mais je me doute fort que ces vers et ceste ame, Accoustumez au feu, ne craignent point ta flame, Et que tous tes efforts n’y profitent de rien. Brûle sans plus les vers et la main malheureuse, Dieu Vulcan, si tu peux ; quant à l’ame amoureuse, Laisses en faire Amour, il la brûlera bien.