Sonnet LXVI. — Beaux yeux, par qui l’Amour entretient sa puissance

Beaux yeux, par qui l’Amour entretient sa puissance, Qui vous juge mortels se va trop abusant. Si vous estiez mortels, vostre esclair si luisant Ne me rendroit pas dieu par sa douce influance. Donc vous estes divins, et tirez vostre essance De l’éternel Amour, l’univers maitrisant. Mais d’où vient, s’il est vray, vostre feu si cuisant ? Car ce qui vient du ciel ne peut faire nuisance. Voilà comme en l’esprit de vous je vay pensant. Puis en fin je resouls que le ciel tout puissant Vous a faits ainsi beaux, clairs, fiers et pitoyables, Non pas que l’âge ingrat merite de vous voir, Mais afin de monstrer qu’il a bien le pouvoir De former des soleils plus que l’autre admirables.