Sonnet LXXVI. — Chere et chaste deesse, honneur de ces bas lieux

Chere et chaste deesse, honneur de ces bas lieux, Orient de mon ame, astre de ma pensée, Pourquoy tant de saisons tenez-vous éclipsée Sur mon seul horizon la clairté de vos yeux ? Quel horrible peché me fait hayr des cieux ? Qu’ay-je fait, qu’ay-je dit pour vous rendre offensée ? Ah ! s’il m’estoit permis, j’ai l’ame si pressée, Que je maudirois tout, et deesses et dieux. Apres m’avoir purgé de toute amour volage, Apres avoir marqué mon cœur de vostre image, Comme estant trop à vous, vous l’avez rejetté. Fut-il onc dans le ciel deïté si cruelle, Qui peut avoir en haine un cœur n’adorant qu’elle Et mespriser le temple où son nom est chanté ?