Sonnet LXXXI. — Pauvre cœur desolé, qui sans aucune offance

Pauvre cœur desolé, qui sans aucune offance Voy ta plus chere part de toy se separer, N’en gemy point si fort, cesse d’en murmurer, Et parmy ces tourmens monstre ta patiance. Songe au cours de ce monde et à son inconstance, Qui fait qu’un mesme estat ne se peut asseurer. Peut-estre apres les maux qu’on te fait endurer, Le sort te livrera quelque meilleure chance. Ainsi comme le ciel se tourne la fortune, Le chaud chasse l’hyver, le soleil la nuit brune, Apres forage espais le clair tans fait retour. L’amant, contant n’aguere, or’ est plein de furie, Et le desesperé s’esjouyst à son tour : Ainsi dessous le ciel toute chose varie.