Sonnet LXXXVIII. — Chacun nous est contraire et s’oppose à nostre aise.

Chacun nous est contraire et s’oppose à nostre aise. Ceux en qui jusqu’icy j’avois eu plus de foy, Maintenant sans raison se bandent contre moy, Et taschent d’amortir nostre amoureuse braise. L’un nous veut estonner par sa langue mauvaise, Seme des bruits menteurs, nous menace du roy ; L’autre, ombrageux, s’offense et si ne sçait de quoy ; L’autre est assez contant, pourveu qu’il nous déplaise. L’amour gist en l’esprit qu’on ne peut empescher : Il n’est huis si gardé, muraille ny rocher, Qui de deux cœurs unis empesche l’entrevuë. Bien que les corps soient loin, ils peuvent sans cesser Se voir et consoler de l’ame et du penser : Le penser aux amans sert de langue et de vuë.