Sonnet V. — Vous n’aimez rien que vous, de vous-mesme maistresse

Vous n’aimez rien que vous, de vous-mesme maistresse, Toute perfection en vous seule admirant, En vous vostre desir commence et va mourant, Et l’amour seulement par vous mesme vous blesse. Franche et libre de soing, vostre belle jeunesse, D’un œil cruel et beau mainte flamme tirant, Brûle cent mille esprits qui, vostre aide implorant, N’esprouvent que fierté, mespris, haine et rudesse. De n’aimer que vous mesme est en vostre pouvoir ; Mais il n’est pas en vous de m’empescher d’avoir Vostre image en l’esprit, l’aimer d’amour extrême. Or l’Amour me rend vostre, et si vous ne m’aimez, Puisque je suis à vous, à tort vous presumez, Orgueilleuse beauté, de vous aimer vous mesme.