Sonnet VII. — Plus j’ay de connoissance, et plus je determine

Plus j’ay de connoissance, et plus je determine De n’aimer rien que vous, seule digne de moy, Digne de m’enlacer d’une éternelle foy, Et que tous mes desirs ayent de vous origine. Belle race du ciel, ame claire et divine, Seule toute mon tout, ma creance et ma loy, Je respire par vous, sans vous rien je ne voy, Et, si j’ay bien ou mal, vostre œil me le destine. Que j’estoy malheureux ne vous connoissant pas ! Comme un qui va de nuict, je chopoy tous les pas. Et prenoy pour ma guide une foible estincelle. Depuis, le ciel benin, pour me recompenser, Me fit voir un soleil, dont la flamme est si belle, Qu’on n’en peut approcher seulement du penser.