Sonnet XC. — Qu’on m’arrache le cœur, qu’on me fasse endurer

Qu’on m’arrache le cœur, qu’on me fasse endurer Le feu, le fer, la rouë et tout autre supplice, Que l’ire des tyrans dessus moy s’assouvisse, Je pourray tout souffrir sans gemir ny pleurer ; Mais qu’on vueille en vivant de moy me separer, M’oster ma propre forme, et par tant d’injustice Vouloir que sans mourir de vous je me bannisse, On ne sçauroit, madame, il ne faut l’esperer. En despit des jaloux par tout je veux vous suivre ! S’ils machinent ma mort, je suy si las de vivre, Qu’autre bien desormais n’est de moy souhaité. Je beniray la main qui sera ma meurtriere, Et l’heure de ma fin sera l’heure premiere Que de quelque repos çà bas j’auray gousté.