Sonnet XII. — Ô journée inconstante, heureuse et malheureuse

Ô journée inconstante, heureuse et malheureuse, Extrême en tous les deux ! Inconstant comme toy, Je ne sçay si maudire ou loüer je te doy, Tant tu m’es à la fois et douce et rigoureuse ! Fut-il onc aux enfers ame si douloureuse ? Les cieux ont-ils un dieu si fortuné que moy ? Mille extrêmes faveurs ont bien-heuré ma foy, Mille extrêmes rigueurs la rendent langoureuse. Ne puissé-je jamais de toy me souvenir ! Mais puissé-je tousjours ce penser retenir, Qui durant mon exil si doucement me touche. Que d’estranges chaos en moy se remesloient ! Son propos me chassoit, ses yeux me r’appelloient : Dieu que j’ayme ses yeux et que je hay sa bouche !