Sonnet XIX. — Douce fin de mes vœux, s’il vous plaist que j’escrive

Douce fin de mes vœux, s’il vous plaist que j’escrive Ces parfaites beautez, dont vous blessez les dieux, Faites tant que je puisse en vous tenir les yeux, Durant que je m’essaye à vous pourtraire vive. Car il ne faut penser autrement que j’arrive Au moindre des beaux traits que vous avez des cieux, Veu qu’il sort de vostre œil tant d’esclairs radieux, Qu’une si grand’ clarté de lumiere me prive. Faites comme Phœbus, quand son fils s’approcha, Qui de son chef doré les rayons destacha, Pour ne l’esblouyr pas de se divine flame. Sinon je ne puy dire, en chantant vos beautez, Fors que je vey des feux et de grandes clairtez, Qui troublerent ma vuë et brûlerent mon ame.