Sonnet XLI. — Je pars, non point de vous, mais de moy seulement

Je pars, non point de vous, mais de moy seulement, Car je laisse mon ame afin qu’elle vous suive ; Et ne vous estonnez que sans ame je vive, Amour me fait mouvoir par son feu vehement. Je ne vous laisse point à ce departement, Bien que vous presumiez n’estre jamais captive ; Car je vous porte au cœur si belle et si naïfve, Que n’avez rien en vous qui n’y soit vivement. Mais pourtant ma douleur n’est par là divertie, Car j’emporte de vous cette seule partie, Qui rafraichit ma perte et l’en fait souvenir. Puis je crains d’autre part, sachant votre rudesse, Que vous receviez mal l’ame que je vous laisse, Et que vous ne vueillez avec vous la tenir.