Sonnet XVI. — Le sculpteur excellent desseignant pour ouvrage

Le sculpteur excellent desseignant pour ouvrage Une plante, un lion, un homme, un élement, Si la main obeyt et suit l’entendement, Trouve en un marbre seul toute sorte d’image. Ainsi rare beauté, sujet de mon courage, Se trouve en vous le bien et le mal d’un amant, Mais, faute de sçavoir, d’art et de jugemant, Voulant choisir le bien, je me prens au dommage. Ce n’est donc le destin par qui tout est forçé, Ce ne sont vos rigueurs, ny le sort courrouçé, Que l’on doit accuser de ma perte inhumaine. La faute est toute à moy : car dedans vostre cœur Est ma vie et ma mort, mon repos et ma paine, Mais je n’en puis tirer que mort, peine et rigueur.