Sonnet XXXII. — Simulacres divins, flammes saintes et claires

Simulacres divins, flammes saintes et claires, Qui luisez dans le ciel de son front spacieux, Et, comme le soleil, par vos traits radieux Dissipez la vertu des splendeurs ordinaires, S’il est vray que tousjours les deux grands luminaires, Les flambeaux arrestez, ceux qui changent de lieux, D’une égale clarté luisent dedans leurs cieux, D’où vient que vos rayons soyent souvent si contraires ? Amour, pere du tout, une fois seulement Leur imposa de luire, et depuis constamment Ils vont gardant leur ordre et sont tousjours semblables. Vous, les spheres d’amour, yeux, celestes flambeaux, Luisez de cent façons divers et variables, Mais doux ou courroucez tousjours vous estes beaux.