Sonnet XXXVI. — Pource que je vous aime à l’égal de mon ame

Pource que je vous aime à l’égal de mon ame, Je vous voy contre moy la haine entretenir. Or, si l’inimitié mon amour fait finir, Changeant de naturel, m’aimerez-vous, madame ? Mais en vain pour mon bien tel secours je reclame, Car vous pourriez plustost amante devenir, Que pour quelque accident qui me sçeust advenir, Je sentisse en l’esprit moins d’amoureuse flame. Le roc de vostre cœur, de glaçons remparé, Plustost s’éclatera d’un feu demesuré, Que l’ardeur qui m’allume en rien soit consumée. Et puis j’ayme trop mieux vous aimer sans espoir Que, ne vous aimant point, à mon gré vous avoir, Car l’amant est tousjours plus divin que l’aimée.