Stances. — En fin les dieux benins ont exaucé mes cris !

En fin les dieux benins ont exaucé mes cris ! La beauté qui me blesse, et qui tient mes espris En langueur continuë, Languit dedans un lict d’un mal plein de rigueur ; Son beau teint devient palle, et sa jeune vigueur Peu à peu diminuë. Plus grand heur en ce tans ne pouvoit m’advenir ; Une heure en son logis on ne l’eust sçeu tenir, Elle eust fait cent voyages, Aux festins, aux pardons d’un et d’autre costé, Et chacun de ses pas au cœur m’eust enfanté Mille jalouses rages. Pour le moins tant de jours qu’au lict elle sera Nonchalante de soy, ma frayeur cessera ; Car ceux qui me font crainte, D’approcher de son lit n’auront pas le pouvoir, Et peut-estre le tans qu’ils seront sans la voir Rendra leur flamme esteinte. Mais, las ! une autre peur va mon cœur desolant ! Je voy qu’elle affoiblit, et son mal violant D’heure en heure prend ame : La force luy defaut à si grande douleur, Les roses de son teint n’ont pas tant de couleur, Ny ses yeux tant de flame. Eh bien ! elle mourra. M’en faut-il tourmenter ? Rien de mieux en ce tans je ne puis souhaiter ; Car s’elle m’est ravie, Et que pour tout jamais son œil me soit couvert, Mon cœur à tant d’ennuis ne sera plus ouvert, Sa mort sera ma vie. Je n’auray plus l’esprit de fureurs embrasé, Mon lict ne sera plus si souvent arrosé, Et la nuict solitaire Ne m’orra tant de fois les hauts cieux blasphemer, Ni la loy des destins qui me force d’aimer, Quand moins je le veux faire. Si tost que son beau corps sera froid et transi, Sur le point de sa mort je veux mourir aussi, La sentence est donnée ; Car ma vie à l’instant de regret finira, Ou par glaive ou poison du corps se bannira Mon ame infortunée. Avec ce dernier acte à tous je feray voir Que moy seul, en vivant, meritoy de l’avoir Pour mon amour fidelle : Car de tant de muguets, qui l’aiment feintement, Je suis seur que pas un, fors que moy seulement, Ne se tûra pour elle. Tous mes maux prendront cesse en ce commun trespas. Je ne douteray plus que jamais icy bas, Son cœur de moy s’estrange ; Et j’aime trop mieux voir nostre mort arriver Que, si vivans tous deux, je m’en voyois priver Par un malheureux change. Ô mort, haste-toi donc ! fay ce coup glorieux, Et de ton voile obscur couvre les plus beaux yeux Que jamais fit nature : Separe un clair esprit d’un corps parfait et beau. Tu mettras avec elle Amour et son flambeau Dedans la sepulture. Las ! en parlant ainsi, je sens soudainement Un spasme, une foiblesse, un morne estonnement, Qui pallit mon visage ; Ma langue s’engourdit, mes yeux sont pleins d’horreur ; Puis en moy revenu, despitant ma fureur, De ces mots je m’outrage : Ô méchant que je suis, ingrat et malheureux ! Je ne merite pas d’estre dit amoureux, J’ay l’ame trop cruelle : Chacun veut de sa dame allonger le destin, Et moy je fay des vœux pour avancer la fin D’une qui m’est si belle. Il faut bien que la rage ait pouvoir dedans moy, Et que le troublement, qui me donne la loy, Soit d’une estrange sorte, Quand, vivant tout en vous, ô mon mal bien-aimé ! N’ayant jour que de vous, par vous seule animé, Je vous souhaite morte. Mais plustost les hauts cieux et tous les élemens, Soient remis pelle-melle en confus broüillemens, Le sec avec l’humide : Puissent tous les humains sans remede finir, Ains que je voye, helas ! vostre mort advenir, Ô ma belle homicide ! Il est vray que pour vous j’ay beaucoup enduré, J’ay porté le regard et l’esprit égaré, J’ay eu la couleur sombre : J’ay pleuré, j’ay crié, mais souvent sans raison, Car j’estoy si troublé de jalouse poison, Que je craignoy mon ombre. Puis quand tous ces soucis pour vous m’iroient suivant, Encore aux ennemis on pardonne souvant, Quand leur fin est prochaine ; Joint qu’un trait de vos yeux doucement élancé, Et vos propos si doux m’ont trop recompensé De tant et tant de peine. Ô dieux, qui d’icy bas les destins gouvernez, Et qui des supplians les malheurs destournez, Oyez ce que je prie ! Rendez saine ma dame avec un pront secours, Et, s’il en est besoin, retranchez de mes jours Pour allonger sa vie. Et toy, dieu cynthien, qui fais tout respirer, Si dès mes jeunes ans on m’a vu t’adorer, Viens alleger ma dame ; Chasse au loin sa langueur, rens luy son teint vermeil ; Soleil, tu aideras à cet autre soleil, Qui esclaire en mon ame.