À Callirée

Cesse, Amour, tes rigueurs, mets fin à ta poursuite, Voy que devant ton vol je retarde ma fuite, Et retourne au chemin que j’avoy délaissé. Comme un serf fugitif, l’œil en bas, je m’accuse ; Je me jette à tes pieds, les fers je ne refuse. Un dieu doit pardonner, quand il est offencé. J’advouë avoir failly ; la faute est excusable, Qu’un roy tel que je suis, courageux, redoutable, Qui sçait bien commander à un peuple indomté, Mais qui ne sçait que c’est de service et de crainte, N’ait peu du premier coup fléchir sous la contrainte, Et se soit essayé de vivre en liberté. Moy que les cieux amis en jeunesse ont fait estre De tant de nations le monarque et le maistre, Se faut-il estonner si, m’estant veu dompter Et ma libre vertu prisonniere estre mise, Je me sois efforcé de la mettre en franchise ? Tousjours le changement est fascheux à porter. Je confesse avoir fait d’un rebelle courage Tout ce que peut un prince ennemy du servage : Le repos ocieux en travail j’ay mué, J’ay comblé mon esprit de soucis et d’affaires, Et forcé pour un tans mes regards volontaires, Les privant à regret des yeux qui m’ont tué. J’ay mille jours entiers, au chaud, à la gelée, Erré la trompe au col par mont et par valée, Ardent, impatient, crié, couru, brossé ; Mais en courant le cerf emplumé de vitesse, Tandis moy pauvre serf d’une belle maistresse, J’estoy d’Amour cruel plus rudement chassé. Ce n’est pas sans raison qu’on te donne des ailes, Un carquois plein de traits et des flammes cruelles ; Enfant victorieux, je l’essaye au besoin. Tu sçais, lorsque je veux de toy libre me rendre, Comme un oyseau de proye en volant me reprendre : Tu as les feux de prez et les fleches de loin. Tout ce que j’ay tenté pour le bien de mon ame. N’a servy que de gomme et de soulphre à ma flame ; Je me suis fait nuisance en me pensant aider. Sus donc, rentrons au joug. C’est estre temeraire De vouloir resister, quand on ne le peut faire ; L’homme sage obeyt, ne pouvant commander. Mais je suis tout confus, quand il faut que je panse De quels yeux, de quel front et de quelle asseurance Je me presenteray pour demander mercy. Las ! que pourroy-je dire en voyant ma deesse ? J’abaisseray la veuë et pleureray sans cesse : Les pleurs pourroient caver un rocher endurcy. La royauté me nuit et me rend miserable ; Jamais à la grandeur Amour n’est favorable. Si je n’estoy point roy, je seroy plus contant : Je la verroy sans cesse et, par ma contenance, Mes pleurs et mes soupirs, elle auroit connoissance Que je sens bien ma faute et qu’en suis repentant. Digne objet de mes yeux, qui m’avez peu contraindre Par tant d’heureux efforts, vostre honneur seroit moindre Si j’avois obey dès le commencement : Deux fois vous m’avez mis en l’amoureux cordage, Deux fois je suis à vous ; c’est l’estre davantage Que si vous m’aviez pris une fois seulement. Il est bien mal-aisé qu’une amour vehemente Soit tousjours en bonace et jamais en tourmente : Vénus, mere d’Amour, est fille de la mer. Comme on voit la marine et calme et courroucée, L’amant est agité de diverse pensée. Qui dure en un estat ne se peut dire aimer. Estre chaud et glacé, s’asseurer en sa crainte, Couvrir mille douleurs d’une allegresse fainte, Renouër son lien apres l’avoir desfait, Monstrer de n’aimer point lors qu’on est tout en flame, Vouloir en mesme tans bien et mal à sa dame, Ce sont les signes vrais d’un amoureux parfait. De ces diversitez l’amour est agitée Et par le desplaisir sa joye est augmentée, S’enrichit de sa perte et renaist en mourant ; Les ennuis, les rigueurs, et toute autre amertume D’absence et de courroux font que son feu s’allume, Qui foible s’esteindroit en repos demeurant. Expert j’en puis parler : mon ardeur retenuë, Au lieu de s’amortir, plus chaude est devenuë Et de ma resistance a pris accroissement, Comme on voit un ruisseau de paisible nature S’accroistre et faire bruit, trouvant une closture Et, n’estant empesché, couler tout doucement. Ô ma seule deesse ! ô belle Callirée ! Comme dans vostre temple en mon cœur adorée, Helas ! j’ay trop souffert, esloigné de vos yeux ! Voyez ma repentance et m’ostez hors de paine. Faillir aucunesfois est une chose humaine, Pardonner et sauver, c’est l’office des dieux.