Allant en Polongne

Puis que j’eu bien le cœur de me separer d’elle, Voyant ses deux beaux yeux si chaudement pleurer, Je l’auray bien aussi pour me desesperer, Et finir par ma mort mon angoisse immortelle. Mourons donc, et monstrons, en ce dernier outrage, Qu’il est tousjours en nous d’échapper le malheur ; Si le coup de la mort me fait quelque douleur, Celuy de mon depart m’en fit bien davantage. Mais quel fleuve de sang peut laver mon offence Et l’erreur que j’ay faite en m’esloignant de vous ? Il n’est point de trespas qui ne me fust trop doux ; Il faut qu’un plus grand mal m’en fasse la vengeance. Entre cent mille horreurs je veux trainer ma vie. Troublé, desesperé, travaillé sans cesser ; Et le dur souvenir d’avoir peu vous laisser Sera de mon esprit l’éternelle furie. J’auray pour me gesner tousjours en la memoire Les biens que j’ay perdus, vos beautez, vos discours, Tant d’estroites faveurs, tant de nuicts, tant de jours, Qu’Amour ne m’espargnoit un seul point de sa gloire ! Ô devoir rigoureux ! grande est la tyrannie Que si superbement tu exerces en moy, Puis que ces doux plaisirs n’ont rien peu contre toy, Et que pour t’obeïr toute amour j’ay bannie ! Bannie, helas ! nenny ! quand et moy je la porte : C’est le sang et l’esprit dont je suis composé, Et le cruel devoir qui me rend maistrisé, Au lieu de l’affoiblir, la fait tousjours plus forte. Il est vray qu’il a peu ceste fois me contraindre, Mais c’est ce qui l’augmente, irritant son effort ; Amour n’est rien que flamme, et la flamme ard plus fort Quand par une closture on la pense restraindre. J’accuse mon devoir d’une erreur que j’ay faite, Moy qui par trop d’égard me suis veu decevoir ; Car falloit-il connoistre en terre autre devoir Qu’estre tousjours aupres de beauté si parfaite ? Mais, qu’eust-on dit de moy ? J’eusse laissé mon maistre, Serviteur infidelle, ingrat et malheureux. Ah ! j’ay trop de raison pour un homme amoureux ! Avec tant de respects Amour ne sçauroit estre. Ce dieu sur tous les dieux n’auroit pas la maistrise, Si tousjours par sagesse il se laissoit guider ; Pour ne connoistre rien l’amant se doit bander, Et faut que toutes loix pour sa dame il mesprise. Ceux qui ne sont touchez de l’amoureuse flame, Dont le sang est moins chaud et le poil plus grison, Gardent seuls le devoir, l’honneur et la raison : Je dois tout violer pour complaire à ma dame. Et puis mon jeune roy n’a pas l’ame sauvage, Amour assez de fois l’a soumis à sa loy ; Quand il eust sceu mon mal, prenant pitié de moy, Il m’eust bien dispensé d’un si fascheux voyage. Aussi bien je le suy separé de moy-mesme, Sans cœur et sans esprit qu’en vos yeux j’ay laissé, Et n’ay plus que le corps, tout palle et tout glacé, Animé seulement de ma douleur extrême. Mais que le fier destin à son gré me promeine D’un et d’autre costé, par les tans plus divers, Sous l’ourse, en la Scythie, entre cent mille hyvers. Tousjours de vostre amour mon ame sera pleine. Mes yeux pourront bien voir mainte chose admirable, Autre ciel, autre terre, autre peuple indonté ; Mais ils ne verront point, loin de vostre beauté, D’objet qui les contente et leur soit agreable.