Chanson. — Doncques ce tyran sans mercy

Doncques ce tyran sans mercy, Qui pour moy n’eut jamais des ailes, N’a point maintenant de soucy Des vassaux qui lui sont fidelles ? Doncques ceux qui plus vivement Ont de son feu l’ame saisie, Il laisse outrager durement Par l’envie et la jalousie ? Rien, rien ne profite la foy, L’ardeur, le zele et le martire ; D’autres qu’Amour donnent la loy, Et faut à leur gré se conduire. Ce dieu qui veit au tans passé Sous luv toute force asservie, Maintenant luy-mesme est forcé Par les jaloux et par l’envie. Las ! il faut mon pié retarder D’aller où le desir me porte, Mon œil n’ose plus regarder L’objet qui seul me reconforte ; Ma main tremble et n’ose tracer L’image qu’au ciel j’ay choisie, Et voy tous mes vers effacer Par l’envie et la jalousie. Je me deffens de respirer, De peur d’éventer ma tristesse, Ma bouche un mot n’ose tirer, Craignant de nommer ma maistresse ; Et pour rendre moins découverts Les feux qui saccagent ma vie, J’erre sauvage en ces deserts, Fuyant les jaloux et l’envie. Mais, si les propos envieux, Ô ma claire et celeste flame ! Separent mes yeux de vos yeux, Ils n’en separent point mon ame ; Tousjours vostre unique beauté M’est presente en la fantaisie : Tel bien ne me peut estre osté Par l’envie et la jalousie. Car, si vostre chaste froideur, Et vos rigueurs pleines de glace N’ont rien peu contre mon ardeur, Moins y peut toute autre menace ; Plus d’ennuis s’iront élevans, Mieux de moy vous serez servie. Tousjours ferme aux flots et aux vans Tant des jaloux que de l’envie.