Chanson. — Que m’a servy de vous avoir servie

Que m’a servy de vous avoir servie Sept ans entiers, à mon mal conjuré, Le plus souvent de vos yeux separé, Non de vos yeux, mais de ma propre vie ? Que m’a servy d’avoir perdu mon ame, Mes pleurs, mon tans, mon repos, ma raison, Et que vostre œil ait seché par sa flame Les belles fleurs de ma jeune saison ? Que m’a servy cette allegresse fainte, Qui seurement ma douleur receloit, Et quand l’amour plus ardant me brûloit, M’estre gardé de lascher une plainte ? Que m’a servy cette libre apparance, Dont j’abusoy vos valets curieux, Et pour chasser toute leur deffiance Avoir donné tant de loix à mes yeux ? Que m’a servy la peine que j’ay prise À gouverner un mary mal-plaisant, Et, tant de jours avec luy m’amusant, Perdre à l’ouyr le peu de ma franchise ? Que m’ont servy ces mespris ordinaires, Qui l’empeschoient de devenir jaloux, Ces libertez et ces feintes coleres, Dont quelquefois vous entriez en courroux ? Que m’ont servy tant d’errantes pensées, Qui m’égaroient loin des gens et du bruit ? Que m’ont servy, sous l’horreur de la nuit, Tant de sanglots et de larmes versées ? Helas ! de rien ; tout me porte nuisance. Et mes respects vous rendent sans pitié ! Car vous croyez qu’en telle patience J’ay peu de mal et fort peu d’amitié. Si j’aimoy bien, je ne pourroy connoistre Tant de dangers que je vay évitant. Un fort desir tout conseil va dontant, Avec l’amour la raison ne peut estre. De tels propos, tyrans de mon courage, Vous me blasmez au lieu de m’estimer : Qui voit si clair et qui demeure sage (Ce dites-vous), ne sçauroit bien aimer. Ah ! je l’advouë et tiens pour veritable Que loin d’Amour la sagesse s’enfuit ; J’en sers de preuve, aimant ce qui me nuit Et bannissant ce qui m’est profitable. Respondez-moy, ma mortelle deesse, Vous qui m’avez en rocher transmué : Est-ce monstrer d’avoir quelque sagesse Que d’adorer vos yeux qui m’ont tué ? Quelle fureur peut estre tant extrême Qu’estre tousjours de soucis agité, Pour l’appetit chasser la volonté, Aimer un autre et se hair soy-mesme ? N’estre jamais une heure en mesme sort Pallir, rougir, esperer et douter, Aux ennemis laisser libre la porte, Et pour les sens la raison rejeter ? Mais plus encor, insensé, je m’outrage ; Car, en pouvant mon ardeur moderer Par mes soupirs, je ne veux soupirer Ny me douloir, pour brûler davantage. C’est peu de cas qu’un mal qui se peut dire, Aupres du mal dans l’esprit retenu, Quand en son dueil on est contraint de rire, Le conservant pour le rendre inconnu. Si toutesfois vous croyez le contraire, Et que je pense, en faisant autrement, Vous asseurer d’aimer plus ardamment, Bien je suivray la coustume ordinaire. Mes passions ne seront plus contraintes, En tous endroits nostre amour se dira ; L’air refrappé ne bruira que mes plaintes, Et sur mon front ma douleur se lira. Sans nul égard par tout je vous veux suivre, J’ay trop long-tans languy loin de vos yeux ; N’esperent plus les propos envieux Me separer du bien qui me fait vivre ! Aucun respect de mary ny de frere Ne me pourra desormais abuser ; À tous propos, sans peur de leur desplaire, Devant leurs yeux je viendray vous baiser. Valets fascheux, qui par vostre presance De voir mon bien m’avez tant sceu garder, Ne pensez plus me pouvoir retarder ; Bien peu me chault qu’en ayez connoissance. Sur ces beautez j’auroy tousjours la veuë, Mes chauds soupirs plus je ne retiendray, Je baiseray ce bel œil qui me tuë, Et de mon mal tout haut je me plaindray. M’advienne apres ce qu’il faut que j’attande De ces hazards, je veux tout endurer ; Au moins ma mort pourra vous asseurer Que non la peur, mais l’amour me commande.