Chanson. — Quel feu par les vens animé

Quel feu par les vens animé, Quel mont nuit et jour consumé Passe mon amoureuse flame ? Et quel ocean fluctueux Escume en flots impetueux Si fort que la mer de mon ame ? L’hyver n’a point tant de glaçons : L’esté tant de jaunes moissons, L’Afrique de chaudes areines, Le ciel de feux estincelans, Et la nuict de songes volans, Que pour vous j’endure de peines. Toute douleur qui nous survient, Peu à peu moins forte devient, Le tans comme un songe l’emporte ; Mais il ne faut pas esperer Que le tans puisse moderer Le mal que vostre œil nous apporte. Rien n’est icy bas de constant Et tout se change à un instant Dessous le cercle de la lune, Les saisons, les jours et les nuits ; Sans plus mes amoureux ennuis Sont hors de la reigle commune. Ce jour me fut bien malheureux, Que je vey vos yeux rigoureux, Quand les miens, nouveaux tributaires, Rendirent mes sens et mon cœur Aux chaisnes de vostre rigueur Depuis liez comme forçaires. Encor le forçaire arresté S’allege en sa captivité, L’espoir luy promet delivrance ; Mais, en mon emprisonnement, Je n’atten point d’allegement, La mort seule est mon esperance. Comme le chasseur va suivant La beste qui volle devant, Laissant celle qui se vient rendre ; Ainsi la mort qui tout destruit, Chasse apres celuy qui la fuit, Et se dédaigne de me prendre. Le jour que je fus asservy, Je vey bien, lorsque je vous vey, Mille beautez vous faire hommage, Mille amours, mille et mille appas ; Mais, ô chétif ! je ne vey pas Mon mal peint en vostre visage. Ravi de vos perfections, Je ne peu voir les passions Sortans des rais de vostre veuë ; Non plus que le pasteur lassé, Qui, dessus les fleurs renversé, Ne voit le serpent qui le tuë. Ce qui rend mon mal plus amer, C’est qu’en souffrant pour vous aimer Douleur qui ne peut estre dite, Je n’en dois attendre aucun bien ; Car toute peine est moins que rien, Eu égard à vostre merite. Si, vous aimant, j’ay trop osé, Amour me doit rendre excusé, C’est un enfant sans connoissance ; De moy, quoy qu’il faille sentir, Je ne me sçaurois repentir D’avoir commis si belle offance. Le plus souvent, en vous voyant, La peur va mes sens effroyant, Et le desespoir qui m’estonne, Tout froid contre mon cœur se joint ; Et donroy, pour ne vous voir point, Le plaisir que vostre œil me donne. D’autres fois quand, tout abbattu, Je languy foible et sans vertu, Vostre beauté ma mort retarde ; Devant vous mes soucis s’en vont, Et du mal que vos yeux me font, Je guary quand je vous regarde. Le traistre, ennemy de ma paix, Me voyant tomber sous le faix, A peur que trop-tost je finisse ; Et fait comme un bourreau cruel. Qui donne à boire au criminel Pour le reserver au supplice. Ainsi pour plus me tourmenter, Quelquefois il me fait gouster D’un plaisir de peu de durée ; Mais, las ! j’espreuve aussi soudain Que ce n’est qu’un songe incertain, Et que ma paine est asseurée. Mon cœur qui souloit paravant Voller leger comme le vant, Au gré de mille damoiselles, Volle autour de vous seulement, Comme oiseau pris nouvellement, Auquel on a coupé les ailes. Quelquefois lassé d’endurer, Je suis contraint de murmurer, Invoquant la mort inhumaine : Mais, quand je la sens accourir, Je tremble, et ne veux pas mourir, De peur de voir mourir ma paine. Mais en vain j’irois esperant De trouver remede en mourant, Contre le desir qui m’enflame, Tousjours durera ma douleur ; Car mon amoureuse chaleur Est de l’essence de mon ame.