Chanson. — Sçavez-vous ce que je desire

Sçavez-vous ce que je desire Pour loyer de ma fermeté ? Que vous puissiez voir mon martire, Comme je voy vostre beauté. Le ciel, ornant vostre jeunesse De ses dons les plus precieux, Pour mieux me monstrer sa richesse, M’éclaira l’esprit et les yeux ; Tousjours depuis je vous admire D’un œil tout en vous arresté. Mais vous ne voyez mon martire, Comme je voy vostre beauté. Maudite soit la connoissance, Qui m’a cousté si cherement ; Ma douleur n’a eu sa naissance Que d’avoir veu trop clairement ; Las ! j’ay bien raison de maudire Ce qui perdit ma liberté, Puis que ne voyez mon martire Comme je voy vostre beauté. L’aveugle enfant qui me commande, Qu’on nomme à tort Dieu d’amitié, Les deux yeux comme à luy vous bande, Afin que soyez sans pitié. Il le faut : car j’ose bien dire Que n’auriez tant de cruauté, Si vous pouviez voir mon martire Comme je voy vostre beauté. Si le ciel de vostre visage Luit de mille perfections, Il n’en peut avoir davantage Que mon cœur a de passions ; Il pleure, il gemist, il soûpire, D’Amour nuict et jour tourmenté ; Helas ! voyez donc mon martire, Comme je voy vostre beauté. Je me plains d’avoir trop de veuë, Moy, qui ne puis voir seulement, Parmy tant d’ennuy qui me tuë, Un seul trait de contentement ; Aveugle au bien je me puis dire, Et au mal trop plein de clarté, Ne pouvant rien voir que martire Au miroir de vostre beauté. Puis qu’on guarist par son contraire, Tout l’espoir que je puis avoir Est de sortir de ma misère, Lors que je cesseray de voir ; À la mort donc je me retire, Pour rendre mon mal limité, Lors, si ne voyez mon martire, Je ne verray vostre beauté.