Complainte pour Monsieur le duc d’Anjou, éleu roy de Pologne, lorsqu’il partit de France (1575)

Qui fera de mes yeux une mer ondoyer, Afin qu’à ce depart je m’y puisse noyer ? Et quel dueil assez pront me fera trepasser, Ô France ! entre tes bras, avant que te laisser ? Quel dieu plein de pitié me faut-il reclamer, Qui me vienne en rocher maintenant transformer, Non pour estre sans ame et pour ne rien sentir, Mais plustost pour jamais de ce lieu ne partir. Pensers trop inhumains, douleurs qui me troublez, Desespoirs violans en mon ame assemblez, Travaux, soucis, regrets, je vous invoque tous, Ne voulant plus avoir d’autre suite que vous ! Tout plaisir desormais loin de moy soit chassé ; Et, s’il me reste rien du bien que j’ay passé, Que c’en soit seulement l’éternel souvenir, Pour toujours ma douleur plus vive entretenir. Ô France ! où j’ay receu tant d’honneurs meritez, Tant planté de lauriers, tant d’ennemis domtez, Je te voy, me perdant, tout en pleurs te baigner ; Je veux donc de mes pleurs les tiens accompagner. Comme un cruel lyon, par les bois traversant, A la biche trop foible un fan va ravissant, Le destin, que les dieux ne sçauroient empescher, Me vient d’entre tes bras forcément arracher. Mais, bien qu’un tel ennuy presse assez ma vertu, Si ne m’eust-il jamais de tout point abatu ; Et la douleur des miens, qu’or’ il me faut quitter, Pouvoit bien m’affoiblir, non pas me surmonter. Ainsi qu’un haut sapin par les vens menacé, Bien qu’il soit esbranlé, n’est pourtant renversé, Mais, quand le fer cruel vient son pié destrancher, Malgré sa resistance est contraint de broncher. Mon cœur creu par la peine, en ce point resistant Aux plus rudes efforts, estoit tousjours constant, Et quand quelque douleur me pensoit esmouvoir, Tousjours pour l’empescher j’opposoy mon devoir. Mais si grand desespoir ma raison va forçant, Que pour y resister je me trouve impuissant, Et me laisse aux ennuis par contrainte emporter, N’ayant rien que les pleurs pour me reconforter. Amour, l’aveugle enfant, m’avoit ouvert les yeux Pour me faire connoistre un chef-d`œuvre des cieux ; Mais, si tost que mon cœur s’est mis à l’adorer, Le malheur me le cache et m’en fait separer. Tout ce que pour mon bien j’avoy voulu choisir, L’espoir de mes travaux, la fin de mon desir, Par un cruel orage, helas ! se va perdant, Et dès le point du jour je voy mon occidant. Que deviendra mon cœur esloigné de son bien ? Que ferez-vous, mes yeux ? Vous ne verrez plus rien. Vostre soleil s’en va, fermez-vous desormais ; Ceste absence aussi bien vous aveugle à jamais. Pourquoy, maudit Amour, l’as-tu voulu graver Si belle en mon esprit, pour soudain m’en priver ? Puisque je ne pouvoy long-tans la regarder, Tu devois, par pitié, comme toy, me bander. D’avoir veu sa beauté tout mon mal est venu. Mais je me plains d’Amour, et je luy suis tenu ; L’heur de voir une fois tant de perfections Ne se peut acheter d’assez de passions. Comme un nouveau printans sa jeunesse florist, Sa grace au mesme point nous blesse et nous guarist, Et tant d’astres au ciel la nuict ne sont plantez, Qu’on voit luire en son front d’admirables beautez. Amour par ses beaux yeux son empire maintient ; Il y donne ses loix, s’y retire et s’y tient, Et luy mesme d’amour s’est si bien affolé, Que pour n’en plus partir son plumage a brulé. De là ce grand vainqueur, tirant visiblement, Ne blesse que les dieux et les rois seulement, Comme digne conqueste, et ne veut employer Les beaux traits de ces yeux pour un moindre loyer. Comme de l’Ocean tous fleuves ont leurs cours, Puis y vont retournant apres divers destours ; Ainsi de sa beauté toute beauté provient, Et, commençant par elle, en elle elle revient. Ou comme le soleil, honneur du firmament, Va de ses clairs rayons toute chose allumant, À toutes les beautez son œil sert de flambeau Et, quand il ne luit point, rien n’apparoist de beau. Ceux qu’un si cher thresor a rendu desireux Ne font plus cas de rien, tout est trop bas pour eux ; Leur esprit seulement vers le ciel est porté, Et leur ciel n’est ailleurs qu’avec sa deïté. Comment donc, malheureux, enduray-je en vivant Que d’un tel paradis le ciel m’aille privant ? Et, pour une grandeur qu’on vient me presenter, Puy-je, helas ! de ses yeux à jamais m’absenter ? Miserable grandeur, source de tous malheurs, La bute des soucis, du soin et des douleurs, Helas ! pourquoy si fort t’allons-nous adorant, Pour un songe d’honneur nos esprits martyrant ? L’honneur tant desiré n’est qu’une vision, Qui, troublant nos esprits par son illusion, Fait quitter l’heur present, pour follement chercher Une ombre qu’on ne peut voir, sentir ny toucher. Quel royaume assez grand, quels ports, quelles citez, Pourront plaire à mes sens de douleur transportez ? J’aimeroy beaucoup mieux moins de commandement : Que sert l’authorité qui n’a contentement ? Comme un que le soleil sans lumiere a laissé Dans un bocage espais, de buissons herissé, Le chemin qu’il tenoit ne sçauroit plus choisir, Et ce qui luy plaisoit luy cause déplaisir. Ainsi, ne voyant plus l’œil du mien adoré, Je seray, miserable, à toute heure égaré ; Et ce qui plus contente un esprit curieux, Loin de vous, mon soleil, sera triste à mes yeux. Prenant congé de vous, je le veux prendre aussi De tant de beaux pensers conservez jusqu’icy ; Je veux de tous plaisirs pour jamais me bannir, Et le seul desespoir avec moy retenir. Adieu, traits et regards si doux et rigoureux ! Adieu, seul paradis des esprits amoureux ! Adieu, divins propos dont le ciel m’est jaloux ! Las ! faut-il pour jamais prendre conge de vous ? Adieu, rares beautez dont mon cœur est blessé ! Mais que pensé-je faire ? ô moy, pauvre insensé ! Pourquoy vous dy-je adieu pour cet esloignement, Puis qu’helas ! je ne pars que de moy seulement ? Je ne pars que de moy, puis qu’il me faut laisser En vos yeux mon esprit, mon cœur et mon penser ; Et que je n’ay plus rien qui me rende animé Que l’ardant feu d’Amour, dont je suy consommé.