Complainte. — Sauvage loy d’Amour et de ma destinée !

Sauvage loy d’Amour et de ma destinée ! Las ! on voit qu’un chacun fuit naturellement Ce qui le peut destruire : et mon ame obstinée Cherche ce qui me tuë et s’y plaist follement. Je sçay que je me pers pour croire à ma jeunesse, Je voy par la raison que c’est trop m’abuzer. Inutile sçavoir dont je ne puis uzer, Miserable raison dont la force est maistresse ! Quand le mal vient d’en haut, vaine est toute deffance, Mieux vaut doncq’ que je cedde avec ce reconfort Que vos rares beautez excusent mon offance, Et que mon haut desir eternise ma mort. Car, si je meurs, madame, en vous faisant service, Jamais plus grand honneur je ne puis acquerir : Vous me recompensez en me faisant mourir, Pourveu que ma douleur par mon trespas finisse. Aussi je ne me plains que me soyez cruelle, Mais, las ! je suis marry de ce qu’en me tuant, Et payant de rigueur mon service fidelle, Vostre honneur peu à peu se va diminuant. Car, si tost qu’on sçaura la perte de ma vie, Chacun, craignant son mal, loin de vous se tiendra Et vous accusera, quand il se souviendra Que vous m’aurez tué pour vous avoir servie. Si donc ma passion n’esmeut vostre courage, Si vous n’avez soucy de ma ferme amitié, Au moins, en m’offensant, ne vous faites dommage ; Ayez de vostre honneur, et non de moy, pitié.