De la vie dou monde

L’autr’ier, par un matin, à l’entrée de mai, Entrai en un jardin : por juer i alai. Desous .i. aubespin .i. petit m’acointai : Escrist en parkemin .i. livret i trovai ; Si luc dusqu’à la fin : mult durement l’amai. Le nom de son autor ne le sien je ne sai. Or me suis porpensés comment l’apellerai : C’est La vie dou monde ; ensi le baptissai. Si vous plaist, escoutez, et je le vos lirai. Sainte Église se plaint ; ce n’est mie mervelle : Cascuns de guerroier contre li s’aparelle. Si fil sont endormi ; n’est nul qui por li velle ; Elle est en grant péril se Diex ne la conselle. Puisque justice cloce, et drois pent et encline, Et vérités cancelle, et loiautés décline, Et carités refroide, et fois faut et défine, Jou dit qu’il n’a ou monde fondement ne racine. Fause marcheandisse est coverte d’usure, Et castés est mise arrière par luxure. Chascuns pense du cors, et de l’âme n’a cure ; Or sachiés que li mondes est en grant aventure. Onques mais ne fu tant de grans préchéeors, Et si ne pert al siècle, trop est de péchéors Qu’il sont tot esbloï aussi comme li ors Et fuient en enfer les galos et les cors. Ains puis ke nostre Sires forma le premier home Ne puis que nostre père Adans manga la pome, Ne fu Diex mains doutés desos la loi de Rome : De Rome vient li max qui les vertus asome. Rome, qui déust estre de nostre loi la fonde, Symonie, avarice, et tos max i abonde : Cil sont plus cunchié qui doivent estre monde Et par malvais exemple ont honni tot le monde. Qui argent porte à Rome, asés tot provende a ; On ne les donne mie si com Diex commenda. On set bien dire à Rome : « Si voille empêtrer : da Et si non voile dare, enda la voie, enda ! » Franche, que de francisse est dite par droit non, A perdu de francisse le los et le renon ; Il n’i a mais nul franc, ne prélas, ne baron, N’en chité, ne à ville, ne en relegion. Au tans que li François vivoient en francisse Par els fu mainte terre garandisse et conquise, Et faisoient li roi dou tout à lor devisse, Car on prioit por els partout en sainte Église. J’oseroie bien dire devant tos cex de Rome Que Diex onneroit plus par la voix d’un prudome U par une viellete, ce de bon cuer le nome, Que par tot l’or d’Espaingne s’il ert en une some. Judas Machabéus nos dist anchienement Que victoire n’est mie en grant masse d’argent, N’en grant chevaucéures, ne grant plenté de gent, Ançois vient dou Signeur qui maint ou firmament. Sainte Église la noble, qui est fille de roi, Espose Jésus-Christ, escole de la loi, Cil qui l’ont aservie ont fait mult grant desroi ; Chou a fait convoitise et défaute de foi. Convoitise vaut pis que ne fait un serpens ; A tout honni le monde, dont je sui mult dolans : Se Charles fust en France encore i fust Rolans ; N’eussent pooir contre els Yaumons ne Agolans. Ains puis que li disimes fut pris en sainte Église, Ne fist li rois de Franche riens qu’il éust emprise ; Damiette, ne Tunes, ne Pulle ne fu prise, Ne ne prist Aragone li rois de saint Denise. Or si gart bien cascuns : tant comme on le penra, Honors, joie, victore as François n’avenra, Et puet bien aprendre cil qui le maintenra, Par les coses passées comment il avenra. Quant Martin l’apostoile, c’on apele Symon, Donna au fil le Roy le règne d’Aragon, S’il li éust donné .xxx. jours de pardon Il li éust miex valu que faire si fait don. Oncques ne vi disime qui fu bien enploiés : Ne puis que l’apostole fust à chou aploiiés, Que li disimes fust donnés et otroiiés, Ne poc véoir le tierme que il fust porpaiés. Desous la loi de Rome n’a nule région Qui à Rome obéisse de cuer se France non, Et de s’obédienche a si biel guerredon Que on li tolt souvent sa laine et sa toison. Por quoi ne prent li papes dizime en Alemaingne, En Baivierre, en Seissongne, en Frise et en Sardaingne ? Il n’i a cardonal, tant haut l’espée çaingne, Qu’il l’alast querre là por estre rois d’Espaingne. Des prélas vos dirai : mais qu’il ne vos anuit, Diex leur a commandé veillier et jor et nuit, Et restraindre leurs rains, et porter fuelle et fruit, Et lumières ardans ; mais ne sont pas tel tuit. Quel gent a Diex laissié por garder sa maison ? Sa vigne est désiertée, n’i labore mais hom ; Li fil Ély le tienent à tort et sans raison, Et si r’est symonie plantée de saison. S’il esquiet une rente à Rains u à Conloingne, S’uns preudons la demande, cuidiés-vos qu’on li donne ? Priamides l’emporte sans noise et sans raloigne, Car Diex est si sofrans que nus ne le resoigne. Quant Diex venra sa vigne véoir por vendengier Et il n’i trovera cose c’on puist mangier, Des malvais se vaurra mult cruement vengier : Il ne seront pas cuite sans plus por laidangier. Des biens de sainte Église se complaint Jésus-Christ Que on met en joiax et en vair et en gris ; S’an traient leur keues Margos et Béatrix, Et li membre Diu sont povre, nu et despris. Molt volontiers quésisse une relegion U je m’âme salvaisse en bone entention, Mais tant voi en pluseur envie, élation, Qu’il ne tiennent de l’ordre fors l’abit et le non. Qui en relegion velt saintement venir, Trois coses li covient et voer et tenir : Casté, povreté et de cuer obéir ; Mais on i voit sovent le contraire avenir. Obédienche gronche, chastés se varie ; Cascuns bée à avoir, povretés est haïe. La parole David est bien entr’oublie, Qui dist : « Rendés-vos veus, ne les trepassés mie. » Chanone séculer mainnent très bone vie : Chacuns a son hostel, son leu et sa mainie, Et s’en i a de tex qui ont grant signorie, Qui poi font por amis et assés por amie. En l’orde des canoines qu’on dist Saint-Augustin, Ils vivent à plenté, sans noise et sans hustin. Je lo qui leur soviègne au soir et au matin Que la chars bien nourie porte à l’âme venin. En l’ordre des noirs moines sont à ço atorné. Il soloient Diu querre mais il sont restorné, Ne Dius n’en trouve nul, car il sont destorné : Mult de bien soloient faire, mais il en sont lassé. L’ordre de Cistiax tiengne à bone et bienséant, Et si croi que il soient preudome bien créant, Mais de tant me desplaist que il sont marcéant, Et de carité faire deviennent recréant. De cex de Prémonstré me convient dire voir : Orgix et convoitise les set bien décevoir ; Il sont par dehors blanc, et par dedens sont noirs : S’ils fussent partot blanc il fesissent savoir. Jacobin, Cordelier sont gent de bon afaire : Il déissent assés, mais il les convient taire, Car li prélat ne vellent qu’il dient nul contraire, A cho que il ont fait n’à cho qu’il voellent faire. Cordelier, Jacobin font granz affliccions, Si dient, car il sueffrent mout tribulacions ; Mais il ont des riche hommes les exécucions Dont il sunt bien fondei et en font granz maisons. Les blances et les grisses et les noires nonains Sont sovent pélerines as saintes et as sains ; Se Dix leur en set gret, je ne sui mie certains : S’eles fuissent bien sages eles alassent mains. Qant ces nonnains se vont par le pays esbatre, Les unes à Paris, les autres à Monmartre, Tel fois emmainne deux qu’on en ramainne quatre, Car s’on en perdoit une il les convanroit batre. Molt mainnent bone vie Bégines et Bégin : Avec eus me rendisse ennuit u le matin, Mais jà ne croira jà glouton delès bon vin, Ne geline avec coc, ne chat avec sain. J’ai grant pièce pensé à ces doiens ruaus, Car jou trover cuidoie aucun prudome entr’aux, Mais il n’a si prodome dusques en Rainscevaux, S’il devenoit doiens, qu’il ne devenist maux. Cil qui doivent les visses blâmer et laidangier, Qui sont prestre, curé, sueffrant maint grant dangier, Et s’en i a de tex qui par sont si légier Que l’évesques puet dire : « J’ai fait d’un leu bergier. » Li Barré, li Sachet, li Frère de la Pie Comment troveront-il en cest siècle lor vie ? Il sont trop tart venu, car il est jà complie, Et s’est li pains donnés, ne s’i atendent mie. Convoitise, qui fait maint avocas mentir Et le droit bestorner et le tort consentir, Les tient en sa prison, ne les lait repentir Devant qu’ele lor face le feu d’infer sentir. Nous avons .ij. preudomes qui font tos les destors, Car il tienent en cause et les drois et les tors : Se meum fust bénis et tuum fust mors, Teus chevauche à lorain qui troteroit en tors. Sor totes autres ordres doit-on mult honorer L’ordre de mariage et amer et garder : Li feme à son baron ne porte loiauté Et li homs à se feme ne amor ne bonté. Certes c’est grans doleurs que je ne puis trover En cest siècle estat ù homs se puist salver. Or prions en la fin au Signor, qui ne ment, Que il tos nos péchiés nous pardoinst et ament, Et nous doinst en cest siècle vivre si saintement Qu’en aions sentensse por nous al jugement.