Dialogue. — Doncques ces yeux bien aimez

Doncques ces yeux bien aimez À la fin se sont armez De feux, d’esclairs et d’orage ? Donc pour ne voir le tourment, Qui me presse injustement, Vous destournez le visage ? Dieux ! que la femme est pronte à changer de courage. Donc pour loyer d’amitié, Ô cœur plein de mauvaisetié ! Tu te plais quand tu m’abuses ? Et couvrant ta fausseté, Tu penses que ma bonté Tousjours se paye d’excuses ? Mais pour te croire plus je connoy trop tes ruses. Helas ! où prenez-vous ce courroux vehement Contre un qui ne veut rien que vous rendre servie ? Mais toy-mesme où prens-tu ce nouveau changement, S’il est vray que je t’aime et que tu sois ma vie ? À bon droit les siecles vieux Nous ont peint Amour sans yeux, Monstrans comme il se doit croire ; Trop d’ardeur le plus souvant, Nos sentimens decevant, En rapporte la victoire, Et fait juger le blanc estre une couleur noire. L’ardeur ne m’aveugle en rien, Ce qui est je le voy bien : Je trouve chaude la flame, Le jour me semble luisant, Et ne faux point en disant Qu’Amour ne loge en ton ame, Ou, s’il te va brûlant, c’est pour une autre dame. Peussé-je à descouvert mon cœur vous faire voir ! Vostre image sans plus s’y trouveroit empreinte. Mais peussé-je aussi-tost guarison recevoir Au mal que tu me fais, comme je sçay ta feinte ! Quelle preuve, ou quelle foy Vous puis-je donner de moy, Qui ces creances efface ? Rien ne sçauroit m’asseurer, Car quelle foy peut jurer Un cœur si plein de fallace, En qui jamais l’amour ny la foy n’eurent place ? La mort que je sens venir, Pour mes angoisses finir, Vous monstrera le contraire. Ah ! trompeur ! tu vas pensant Que ce propos soit puissant Pour adoucir ma colere ? Je connoy ta feintise et ta ruse ordinaire. Puissé-je donc mourir si j’aime autre que vous ! Les sermens amoureux ne font moindre l’offance. Qui peut donc appaiser vostre injuste courroux ? Le desir esperé d’une pronte vengeance. Moderez cette fureur, Il n’y a si grande erreur Qu’une forte amour n’oublie. Mais il n’est amour si fort Quand souvent on luy fait tort, Qui ne se change en furie. Grande amour en grand’ haine est souvent convertie. Les courroux des vrais amans Font par leurs embrasemans Que l’amour plus fort s’enflame. Helas ! je l’esprouve assez ! Car tant d’outrages passez, Au lieu d’esteindre ma flame, La font plus violente et plus vive en mon ame. Quelle preuve, ô mon bien ! m’en peut rendre asseuré ? Comment croiray-je, helas ! que vostre ire est passée ? Vous redonnant mon cœur que j’avois retiré, Et n’aimant rien que vous, qui m’aviez deslaissée.