Élégie. — Jamais foible vaisseau, deçà, delà porté

Jamais foible vaisseau, deçà, delà porté, Par les fiers aquilons ne fut tant agité L’hyver en plaine mer, que ma vague pensée Est des flots amoureux haut et bas élancée. Ainsi qu’un patient, dont l’esprit est troublé Par l’effort rigoureux d’un accez redoublé, Flotte en songes divers ; l’humeur qui le tourmente Fait chanceler son ame, et la rend inconstante ; Un debat apres l’autre en l’esprit lui revient. Ainsi je rêve, helas ! quand ma fièvre me tient, Chaude fièvre d’Amour inhumaine et contraire, Dont je ne veux guarir quand je le pourroy faire. J’erre égaré d’esprit, furieux, inconstant, Et ce qui plus me plaist me desplaist à l’instant ; J’ay froid, je suis en feu, je m’asseure et défie, Sans yeux je voy ma perte, et sans langue je crie, Je demande secours, et m’élance au trespas ; Or’ je suis plein d’amour, et or’ je n’aime pas, Et couve en mon esprit un discord tant extrême, Qu’aimant je me veux mal de ce que je vous aime. Il faut, en m’efforçant, cette pointe arracher Qu’Amour dedans mon cœur a sçeu si bien cacher ; Esteignons toute ardeur en nostre ame allumée, Et n’attendons pas tant qu’elle en soit consumée. Desjà je connoy bien que je sers vainement, C’est de ma guarison un grand commencement ; Mais las ! qu’en foible endroit j’assié mon esperance ! Aux extrêmes perils peu sert la connoissance. Si je connoy mon mal je n’en pers la douleur ; Connoistre et ne pouvoir, c’est un double malheur. J’embrase ma fureur, la pensant rendre étainte, Et voulant n’aimer plus, j’aime, helas ! par contrainte ; Mais, si je pers mon tans sous l’amoureuse loy, Quel autre des humains l’employe mieux que moy ? L’un à qui le dieu Mars aura l’ame enflammée, Accourcissant sa vie, accroist sa renommée ; L’autre moins courageux, d’avarice incité, Cherche aux ondes sa mort, fuyant la pauvreté ; L’autre en la cour des roys brûlé de convoitise, Pour un espoir venteux engage sa franchise ; L’autre fend ses guerets par les coultres trenchans, Et n’estend ses désirs plus avant que ses champs. Bref, chacun se travaille, et nostre vie humaine N’est que l’ombre d’un songe et qu’une fable vaine. Je suis donc bien-heureux d’avoir sçeu mieux choisir, Sans loger icy bas mon celeste desir : Un puissant dieu m’arreste et, pour gloire plus grande, Il me met sous le joug d’une qui luy commande : Sçachant ne pouvoir rendre autrement captivé Mon esprit, qui tousjours au ciel s’est élevé. L’aigle, courrier du foudre et ministre fidelle Du tonnant Jupiter, roy des oyseaux s’appelle, Pource que sans fléchir il soustient de ses yeux Les traits ébloüissants du soleil radieux, Et que d’une aile pronte, au travail continuë, S’élevant sur tout autre il se perd dans la nuë. Moy donc, qui dresse au ciel mon vol avantureux, Doy-je pas me nommer l’aigle des amoureux ? Car, si l’aigle regarde un soleil plein de flame, Je soustien fermement les deux yeux de ma dame, Deux soleils flambloyans de rayons éclaircis, Et qui d’ombreuse nuit ne sont jamais noircis. Lorsque sans y penser par fortune j’advise Ces amans abusez, qui ont l’ame surprise De quelque autre beauté, je me sens bien-heureux D’estre ainsi que je suis pour ses yeux langoureux, Et plains leur passion comme mal despenduë, Croyant qu’en autre part toute peine est perduë ; Et dy en m’estonnant : Dieu ! quel aveuglement Trouble si fort leurs yeux et leur entendement Qu’ils n’aiment pas ma dame ! Amour, qui les offance, Se monstre en leur endroit enfant sans connoissance. De moy, rien que cet œil ne m’eust sçeu faire aimer, L’ardeur d’autre desir ne pouvoit m’enflamer, Un trait moins aceré n’eust mon ame blessée, Et de moins blonds cheveux ne l’eussent enlacée : Autre amoureux propos ne m’eust pas enchanté, Et n’eusse point languy pour une autre beauté : Amour, je te pardonne, et ne fay plus de plainte, Puis que si belle flèche en mon sang tu as tainte. Car, pris en si haut lieu, j’aime tant mon tourment, Qu’en l’assaut des douleurs je me plains seulement Que si tard sa beauté mon ame ait retenuë, Et porte envie aux yeux qui devant moy l’ont vuë. Ah ! qu’Amour m’a fait tort de m’avoir tant celé L’heur où le ciel m’avoit en naissant appelé ! Amans desesperez qui l’avez tant servie, Chargez de mille ennuis, que je vous porte envie ! Las ! pourquoy, malheureux, ai-je tant attendu ? Je voudroy, comme vous, m’estre plustost perdu, Sans avoir si long-tans fait errer mon courage Au gré de mille amours, inconstant et volage. Mais je me plains à tort : mon bon-heur a souffert Que j’aye aimé devant, pour estre plus expert, Et sçavoir mieux couvrir mon amoureuse flame, Quand les yeux d’Hippolyte auroient forcé mon ame : L’experience apprend. En ce commencement, Pour estre un jour parfait j’apprenoy seulement : Helas ! pour mon malheur j’en ay sçeu trop apprendre ! Heureux qui n’y sçait rien, et n’en veut rien entendre ! Or je sçay reçonnoistre Amour pour mon vainqueur, Comme ou vit en aimant sans esprit et sans cœur, Comme on peut receler une douleur mortelle : Je sçay brûler de loin et geler aupres d’elle : Je sçay comme le sang, vers le cœur s’amassant, De honte ou de frayeur rend un teint pallissant : Je sçay de quels filés la liberté s’attache, Je sçay comme un serpent parmy les fleurs se cache, Comme on peut sans mourir mille morts esprouver, Chercher mon ennemie et craindre à la trouver. Je sçay comme l’amant en l’amante se change, Et comme au gré d’autruy de soy-mesme on s’estrange, Comme on se plaist au mal, comme on veille en dormant, Comme on change d’estat cent fois en un momant : Je sçay comme Amour volle, errant de place en place, Comme il frape les cœurs avant qu’il les menace, Comme il se paist de pleurs et de soupirs ardans, Enfant doux de visage et cruel au dedans, Qui de traits venimeux et de flames se jouë, Et comme instablement il fait tourner sa rouë. Je sçay des amoureux les changemens divers, Leurs pensers incertains, leurs desirs plus couvers, Leur malheur asseuré, leur douteuse esperance, Leurs mots entre rompus, leur pronte meffiance, Leurs discordans accords, leurs regrets et leurs pleurs, Et leurs trop cours plaisirs pour si longues douleurs. Bref, je sçay pour mon mal, comme une telle vie, Inconstante, incertaine, à tous maux asservie, S’égare au labyrinth de diverses erreurs, Sujette à la rigueur de toutes les fureurs, Et comme un chaud desir, qui l’esprit nous allume, Enfielle un peu de miel de beaucoup d’amertume.