La Bataille des Vices contre les Vertus

Puisqu’auteurs et auctoritez S’acordent que c’est véritez Qui est oiseus, de légier pèche, Et cil s’âme trahist et trèche Qui sanz ouvrer sa vie fine, Quar tel vie n’est mie fine, Por ce me vueil à oevre metre Si com je m’en sai entremette : C’est à rimer une matire Au leu d’ouvrer, à ce m’atire, Quar autre ouvraingne ne sai fère ; Or entendez à mon afère : Si orrez de .ij. ordres saintes Que Diex a esléus en maintes Qu’aus vices se sont combatu, Si que vice sont abatu Et les vertuz sont essaucies ; S’orrez comment els sont haucies Et comment visce sont vaincu. Humilité par son escu A Orgueil à la terre mis, Qui tant estoit ses anemis. Larguece i a mis Avarisce, Et Deboneretez .i. visce C’on apele Ire la vilaine ; Et Envie, qui partout raine, R’est vaincue par Charité. De ce dirai la vérité : C’est or ce que poi de gent cuide. Proesce r’a vaincue Accide, Et Abstinence Gloutonie Qui mainte gent avoit honie Et mainte richece gastée. S’orrez comment dame Chastée, Qui tant est fine et nete et pure, A vaincue dame Luxure. N’a pas bien .lx. et .x. anz, Se Rustebués est voir disanz, Que ces .ij. saintes ordres vinrent Qui les fez aus apostres tindrent, Par préeschier, par laborer, Par Dieu servir et aorer. Menor et Frère Prêchéeur, Qui des âmes sont peschéeur, Vindrent par volonté devine. Je di por voir, non pas devine, S’il ne fussent encor venu Maint grant mal fussent avenu Qui sont remez et qui remaingnent Par les granz biens que il enseignent. Por preschier humilité Qui est voie de vérité, Por l’essaucier et por l’ensivre, Si comme il truevent en lor livre, Vindrent ces saintes genz en terre : Diex les envoia por nous querre. Quant il vindrent premièrement Si vindrent assez humblement : Du pain quistrent, tel fu la riègle, Por oster les péchiez du siècle. S’il vindrent chiés povre provoire, Tel bien comme il ot, c’est la voire, Pristrent en bone paciance El non de sainte Pénitance : Humilitez estoit petite Qu’il avoient por aus eslite : Or est Humilitez greignor Que li frère sont or seignor Des rois, des prélas et des contes. Par foi, si seroit or granz hontes S’il n’avoient autre viande Que l’Escripture ne demande, Et ele n’i met riens ne oste Que ce c’on trueve en chiés son oste. Humilitez est tant créue C’Orguex corne la recréue ; Orguex s’en va, Diex le cravant, Et Humilitez vient avant ; Et or est bien droiz et resons Que si granz dame ait granz mesons Et biaus palais et beles sales. Maugré toutes les langues males, Et la Rustebuef tout premiers, Qui d’aus blasmer fu coustumiers, Ne vaut-il miex c’Umilité Et la sainte Divinité Soit léue en roial palais, C’on fist d’aumosnes et de lais, Et de l’avoir au meillor roi C’onques encor haïst desroi, Que ce c’on secorust la terre Où li fol vont folie querre, Constantinoble, Rommenie ? Se sainte Yglise escommenie, Li Frère puéent bien assaudre, S’escommeniez a que saudre. Por miex Humilité desfendre, S’Orguex se voloit à li prendre, Ont fondé .ij. palais li Frère, Que foi que doi l’âme mon père, S’ele avoit léenz à mengier Ne sire Orgueil ne son dangier Ne priseroit vaillant .i. oes Deçà .viij. mois, non deçà .ix., Ainz atendroit bien dès le liége C’on li venist lever le siége. Or parlent aucun mesdisant Qui par le païs vont disant Que se Diex avoit le roi pris Par qui il ont honor et pris, Mult seroit la chose changie Et lor seignorie estrangie ; Et tels lor fet or bèle chière Qui pou auroit lor amor chière, Et tels lor fet samblant d’amor Qui ne le fet fors por cremor. Et je respont à lor paroles, Et di qu’els sont vaines et voles : Se li Rois fet en aus s’aumosne Et il de ses biens lor aumosne Et il en prennent, il font bien ; Quar il ne sevent pas combien Ne com longues ce puet durer. Li sages hom se doit murer Et garnir por crieme d’assaut : Por ce vous di, se Diex me saut, Qu’il n’en font de riens à blasmer. Se l’en lor fet samblant d’amer Il en sevent aucune chose : Por ce ont-il si bien lor cort close, Et por ce font-il ce qu’il font. L’en dit mauvès fondement font ; Por ce font-il lor fondement En terre si parfondément, Quar s’il estoit demain chéus Et li rois Loys fust féus Il se penssent bien tout l’afère Que il auroient mult à fère Ainz qu’il éussent porchacié Tel joiel comme il ont brassié : Le bien praingne l’en quant l’en puet, C’on ne le prent pas quant l’en vuet. Humilitez est si grant dame Qu’ele ne crient home ne fame, Et li frère qui la maintienent Tout le roiaume en lor main tienent ; Les secrez encerchent et quièrent, Partout s’embatent et se fièrent : S’on les lest entrer ès mesons Il i a .iij. bones resons : L’une est qu’il portent bone bouche, Et chascuns doit douter reprouche ; L’autre c’on ne se doit amordre A vilener nule gent d’ordre ; La tierce si est por l’abit, Où l’en cuide que Diex abit, Et si fet-il, je n’en dout mie Ou ma penssée est m’anemie. Par ces resons et par mainte autre Font-il aler lance sor fautre Larguece desor Avarisce ; Quar trestoute la char hérice Au mauvès qui les voit venir : Tart li est qu’il puisse tenir Chose qui lor soit bone et bele ; Quar il sevent mainte novele. Si lor fet cil joie et feste Por ce qu’il se doute d’enqueste, Et font tel tenir à preudomme Qui ne croit pas la loi de Romme. Ainsi font large de l’aver, De tel qu’il devroient laver Le don qu’il reçoivent de lui. Li frère ne doutent nului, Ce puet l’en bien jurer et dire. De Débonereté et Ire Orrez le poingneis mortel ; Mès en l’estor i ot mort tel, Dont domages fu de sa mort. La mort, qui à mordre s’amort, Qui n’espargne ne blanc ne noir, Mena celui à son manoir. Si n’estoit pas mult anciens, Et ot non mestre Crestiens, Mestre estoit de divinité ; Pou verrez mes devin ité. Deboneretez et dame Ire, Qui sovent a mestier de mire, Vindrent, lor genz toutes rengies, L’une des autres estrangies, Devant l’apostoile Alixandre, Por droit oïr et por droit prendre. Li frère Jacobin i furent Por oïr droit si comme il durent, Et Guillaume de Saint-Amor ; Quar il avoient fet clamor De ses sermons, de ses paroles. Si m’est avis que l’apostoles Bani icel mestre Guillaume D’autrui terre et d’autre roiaume. S’il a partout tel avantage, Baron i ont honte et domage, Qu’ainsi n’ont-il rien en lor terre Qui la vérité veut enquerre. Or dient mult de bone gent, Cui il ne fu ne bel ne gent Qu’il fust baniz, c’on li fist tort ; Mès ce sachent et droit et tort C’on puet bien dire trop de voir ; Bien le poez apercevoir Par cestui qui en fu banis, Et si ne fu mie fenis Li plais, ainz dura par grant pièce ; Quar la cort, qui fet et depièce, N’ut Guillaume de Saint-Amor, Et par prière et par cremor. Cil de cort ne sevent qu’il font, Quar il font ce qu’autres desfont, Et si desfont ce qu’autres fet ; Ainsi n’auront-il jamès fet.