La Complainte de monseigneur Joffroi de Sergines

Qui de loial cuer et de fin Finement jusques en la fin A Dieu servir defineroit, Qui son tens i afineroit Finement devroit definer Et de légier vers Dieu finer. Qui le sert de pensée fine Cortoisement en la fin fine, Et por ce se sont rendu maint Qu’envers celui qui lasus maint Puissent finer cortoisement. S’en vont li cors honteusement, Ce di-je por relegieus, Que chascuns d’els n’est pas prieus, Et li autres r’ont geté fors Le preu des âmes por le cors, Qui riens plus ne vuelent conquerre, Fors le cors honorer sor terre. Issi est partie la riègle De cels d’ordre et de cels du siècle ; Mès qui porroit en lui avoir Tant de proèce et de savoir Que l’âme fust et nete et monde Et li cors honorez el monde, Ci auroit trop bel avantage ; Mès de cels n’en sai-je c’un sage, Et cil est plains des Dieu doctrines. Mesires Giefroiz de Surgines A non li preudom que je nomme, Et si le tiennent à preudomme Empereor et roi et conte Assez plus que je ne vous conte. Toz autres ne pris .ij. espèches Envers lui, quar ses bones tèches Font bien partout à reprouchier. De ses tèches vous vueil touchier .J. pou selonc ce que j’en sai ; Quar qui me metroit à l’essai De changier âme por la moie, Et je à l’eslire venoie, De toz cels qui orendroit vivent, Qui por lor âme au siècle estrivent, Tant quièrent pain trestoz deschaus Par les granz frois et par les chaus, Ou vestent haire, ou çaignent corde, Ou plus facent que ne recorde, Si penroie ainz l’âme de lui Plus tost, je cuit, que la nului. D’endroit du cors, vous puis-je dire Que qui me mestroit à l’eslire L’un des bons chevaliers de France Ou du roiaume, à ma créance, Jà autre de lui n’esliroie. Je ne sai que plus vous diroie, Tant est preudom, si com moi sanble, Qui a ces .ij. choses ensanble, Valor de cors et bonté d’âme. Garant li soit la douce Dame, Quant l’arme du cors partira, Qu’ele sache quel part ira, Et le cors ait en sa baillie, Et le maintiengne en bone vie ! Quant il estoit en cest païs (Que ne soie por fols naïs De ce que je le lo tenuz), N’i estoit jone ne chenuz Qui tant péust des armes fère. Douz et cortois et débonère Le trovoit-l’en en son ostel ; Mès aus armes autre que tel Le trovast li siens anemis Puis qu’il s’i fust meslez et mis. Mult amoit Dieu et sainte Yglise ; Si ne vousist en nule guise Envers nului foible ne fort, A son pooir mesprendre à tort. Ses povres voisins ama bien : Volontiers lor donoit du sien, Et si donoit en tel manière Que miex valoit la bele chière Qu’il fesoit au doner le don Que li dons. Icil bons preudom, Preudomme crut et honora, N’ainz entor lui ne demora Faus losengier puis qu’il le sot ; Quar qui ce fet, je l’ tieng à sot. Ne fu mesliz, ne mesdisanz, Ne vanterres, ne despisanz. Ainz que j’éusse raconté Sa grant valor ne sa bonté, Sa cortoisie ne son sens, Torneroit à anui, ce pens. Son seignor lige tint tant chier Qu’il ala avoec li vengier La honte Dieu outre la mer : Tel preudomme doit l’en amer. Avoec le roi demora là, Avoec le roi mut et ala, Avoec le roi prist bien et mal : L’en n’a pas toz jors tens igal. Ainz por paine ne por dolor Ne corouça son Sauvéor : Tout prist en gré quanqu’il souffri ; L’âme et le cors à Dieu offri. Ses conseus fu bons et entiers Tant comme il fu poins et mestiers, Ne ne chanja por esmaier. De légier devra Dieu paier, Quar il le paie chascun jor. A Jasphes, où il fet séjor, Se il est jor de guerroier, Là veut-il son tens emploier : Félon voisin et envieus, Et cruel et contralieus Le truevent la gent sarrasine, Quar de guerroier ne les fine. Sovent lor fet grant envaïe, Que sa demeure i est haïe. Dès or croi-je bien cest latin : Mal voisin donc mal matin. Son cors lor présente sovent ; Mès il a trop petit covent. Se petiz est, petit s’esmaie, Quar li paierres qui bien paie Les puet bien sanz doute paier, Que nus ne se doit esmaier Qu’il n’ait corone de martir Quant du siècle devra partir ; Et une riens les reconforte, Que puis qu’il sont fors de la porte Et il ont monseignor Giefroi, Nus d’els n’ert jà puis en effroi, Ainz vaut li vins au besoin .iiij ; Mès sanz lui ne s’osent combatre. Par lui joustent, par lui guerroient ; Jamès sanz lui ne se verroient En bataille ne en estor, Qu’il font de lui chastel et tor. A lui s’asenent et ralient, Quar c’est lor estandart, ce dient. C’est cil qui du champ ne se meut ; El champ le puet trover qui veut : Ne jà por fais que il soustiengne Ne partira de la besoingne, Quar il set bien, de l’autre part, Se de sa partie se part, Ne puet estre que sa partie Ne soit tost sanz lui départie. Sovent assaut et va en proie Sor cele gent qui Dieu ne proie, Ne aime, ne sert, ne aeure, Si com cil qui ne garde l’eure Que Diex en face son voloir. Por Dieu fet mult son cors doloir : Issi sueffre sa pénitance, De mort chascun jor en balance. Or prions donques à celui Qui refuser ne set nului Qui le veut prier et amer, Qui por nous ot le mors amer De la mort vilaine et amère, En cele garde qu’il sa mère Commanda à l’évangelistre Son droit mestre et son droit menistre, Le cors à cel preudomme gart Et l’âme reçoive à sa part. Amen.