La Complainte dou conte de Poitiers

Qui ainme Dieu et sert et doute Volentiers sa parole escoute : Ne crient maladie ne mort Qu’à lui de cuer ameir s’amort ; Temptacions li cemble vent, Qu’il at boen escu par devant : C’est le costei son criatour Qui por nos entra en l’estour De toute tribulacion Sens douteir persécucion. De son costei fait-il son hiaume, Qu’il désirre lou Dieu roiaume, Et c’en fait escuit et ventaille Et blanc haubert à double maille ; Et si met le cors en présent Por celui qui le fais pésent Vout soffrir de la mort ameire. De légier laisse peire et meire, El fame et enfans et sa terre, Et met por Dieu le cors en guerre Tant que Dieux de cest siècle l’oste : Lors puet savoir qu’il a boen hoste, Et lors resoit-il son mérite, Que Dieux et il sunt quite et quite. Ainsi fut li cuens de Poitiers, Qui toz jors fu boens et entiers : Chevaucha cest siècle terrestre Et mena paradix en destre. Véu aveiz com longuement At tenu bel et noblement Li Cuens la contei de Tholeuze, Que chascuns resembleir goleuze Par son sanz et par sa largesse, Par sa vigueur, par sa proesse, C’onques n’i ot contens ne guerre, Ainz a tenu en pais sa terre : Por ce qu’il me fist tant de biens Vo voel retraire .i. pou des siens. Vos saveiz et deveiz savoir Li commencemens de savoir : Si est c’om doit avoir paour De correcier son Saveour, Et li de tout son cuer ameir Qu’en s’amitié n’a point d’ameir ; En s’amitié n’a point d’ameir, En s’amitié n’a fin ne fons : Tant l’ama li bon cuens Aufons Que ne croi c’onques en sa vie Pensast .i. rain de vilonie. Se por ameir Dieu de cuer fin Dou bersuel juques en la fin Et por sainte Églize enoreir, Et por Jhésu-Crist aoureir En toutes les temptacions, Et por ameir religions Et chevaliers et povre gent Où il a mis or et argent, C’onques ne fina en sa vie, Ce por c’est arme en cielz ravie, Dont i est jà l’arme le Conte Où plus ot bien que ne vos conte. Se que je vi puis-je bien dire : Onques ne le vi si plain d’ire C’onques li issist de sa bouche Choze qui tornast à reprouche ; Mais biaux moz, boenz enseignemens. Li plus grans de ces sairemens Si estoit : Par sainte Garie ! Miraours de chevalerie Fu-il tant com il a vescu. Mult orent en li boen escu Li povre preudome de pris. Sire Dieux ! où estoit ce pris Qu’il lor donoit sens demandeir ? Ne’s convenoit pas truandeir Ne faire parleir à nelui : Ce qu’il faisoit faisoit de lui, Et donoit si cortoisement, Selonc chacun contenement, Que n’uns ne l’en pooit reprandre. Hom nos at parlei d’Alixandre, De sa largesce, de son sans, Et de se qu’il fist à son tans : S’en pot chacuns c’il vot mentir, Nei nos ne l’osons desmentir, Car nos n’estions pas adonc ; Mais ce, por bontei ne por don, A preudons le règne célestre, Li cuens Aufons i doit bien estre. Tant ot en son cuer de pitié, De charitei et d’amistié Que n’uns ne l’ vos porroit retraire. Qui porroit toutes ces mours traire El cuer à .i. riche jone home, Hon en feroit bien .i. preudome. Boens fu au boens et boens confors, Maus au mauvais et terriés fors, Qu’il lor rendoit cens demorance Lonc le péchié la pénitance ; Et il le connurent si bien C’onques ne li meffirent rien. Dieux le tanta par maintes fois Por connoistre queiz est sa fois ; Si connoist-il et cuer et cors Et par dedens et par defors. Job le trouva en paciance Et saint Abraham en fiance ; Ainz n’ot fors maladie ou painne : S’en dut estre s’arme plus sainne. Outre meir fu en sa venue, Où mult fist bien sa convenue Avec son boen frère le Roi. Plus bel hosteil, plus bel aroi Ne tint princes emprès son frère. Ne fist pas honte à son boen père, Ainz montra bien que preudons ière De foi, de semblanc, de menière. Or l’a pris Diex en son voiage Ou plus haut point de son aage, Que s’on, en ceste région, Féist roi par élection Et roi orendroit i fausist, Ne sai prince qui le vausist. Li vilains dist : « Tost vont noveles : Voire, les bones et les beles ; Mais qui male novele porte, Tout à tang vient-il à la porte, Et si i vient-il toute voie. » Tost fu séu que en la voie De Tunes, en son revenir, Vout Dieux le Conte detenir. Tost fu séu, et sà et là, Partout la renomée ala, Partout en fu faiz li servizes En chapeles et en esglizes. Partiz est li Cuens de cest siècle Qui tant maintint des boens la riègle. Je di por voir, non pas devin, Que Tolozain et Poitevin N’auront jamais meilleur seigneur : Ausi boen l’ont-il et greigneur. Tant fist li Cuens en cestui monde Qu’avec li l’a Diex net et monde. Ne croi que priier en conveigne : Prions-li de nos li soveigne.