La Griesche d’esté

En recordant ma grant folie, Qui n’est ne gente ne jolie Ainz est vilaine Et vilains cil qui la demaine, Me plaing .vij. jors en la semaine Et par reson : Si esbahiz ne fu mès hom Qu’en yver toute la seson Ai si ouvré Et en ouvrant m’ai aouvré Qu’en ouvrant n’ai rien recouvré Dont je me cuevre. Ci a fol ouvrier et fole oevre ; Qui par ouvrer riens ne recuevre Tout torne à perte, Et la griesche est si aperte, Qu’eschec dit à la descouverte A son ouvrier, Dont puis n’i a nul recouvrier. Juingnet li fet sambler février. La dent dit : « Cac, » Et la griesche dit : « Eschac ; » Qui plus en set s’afuble sac De la griesche. De Gresce vient, si griez éesche ; Or est la Borgoingne brièsche. Tant a venu De la gent qu’ele a retenu, Sont tuit cil de sa route nu Et tuit deschaus ; Et par les froiz et par les chaus, Nès li plus mestres seneschaus, N’ont robe entière. La griesche est de tel manière Qu’ele veut avoir gent légière En son servise. Une cure en cote, autre en chemise. Tel gent aime com je devise : Trop het riche homme ; S’aus poins le tient éle l’assomme. En cort terme set bien la somme De son avoir : Plorer li fet son non-savoir ; Souvent li fet gruel avoir, Qui qu’ait avaine : Tramblé m’en a la mestre vaine. Or vous dirai de lor couvaine ; J’en sai assez. Sovent en ai esté lassez : Mi-marz que li frois est passez, Notent et chantent. Li .i. et li autre se vantent Que se dui dé ne les enchantent Il auront robe. Espérance les sert de lobe Et la griesche les desrobe. La borse est vuide ; Li geus fet ce que l’en ne cuide : Qui que tisse chascuns desvide ; Li penssers chiet ; Nul bel eschet ne lor eschiet. N’en puéent mès qu’il lor meschiet, Ainz lor en poise : Qui qu’ait l’argent, Diex a la noise. Aillors covient lor penssers voise, Quar .ij. tornois, .Iij. paresis, .v. vienois, Ne puéent pas fère .i. borgois D’un nu despris. Je ne di pas que je’s despris, Ainz di qu’autres conseus est pris. De cel argent Ne s’en vont pas longues charjant ; Por ce que li argens art gent, N’en ont que fère, Ainz entendent à autre afère : Au tavernier font du vin trère ; Or entre boule Ne boivent pas, chascuns le coule. Tant en entonent par la goule, Ne lor sovient Se robe achater lor covient. Riche sont, mès ne sai dont vient Lor grant richèce : Chascuns n’a riens quant il se drèce. Au paier sont plains de perèce : Or faut la feste, Or remainent chançons de geste ; Si s’en vont nu comme une beste Quant il s’esmuevent. A lendemain povre se truevent ; Li dui dé povrement se pruevent : Or faut quaresme Qui lor a esté dure et pesme. De poisson autant com de cresme I ont éu : Tout ont joué, tout ont béu. Li uns a l’autre decéu, Dist Rustebués, Por lor tabar, qui n’est pas nués, Qui toz est venduz en .ij. oés ; Et avril entre, Et il n’ont riens defors le ventre. Lors sont il viste et prunte et entre : S’il ont que metre, Lors les verriiez entremetre De dez prendre et de dez jus metre. Ez vous la joie : N’i a si nu qui ne s’esjoie ; Plus sont seignor que ras sus moie. Tout cel esté Trop ont en grant froidure esté. Or lor a Diex .i. tens presté Où il fet chaut, Et d’autre chose ne lor chaut : Tuit ont apris aler deschaut.